லண்டன்,

இந்தியா- இங்கிலாந்து கிரிக்கெட் அணிகள் இடையிலான 5-வது மற்றும் கடைசி டெஸ்ட் போட்டி லண்டன் ஓவலில் நேற்று முன்தினம் தொடங்கியது. இதில் முதலில் பேட் செய்த இந்திய அணி முதல் இன்னிங்சில் 69.4 ஓவர்களில் 224 ரன்னில் ஆல்-அவுட் ஆனது. அதிகபட்சமாக கருண் நாயர் 57 ரன்கள் அடித்தார். இங்கிலாந்து தரப்பில் வேகப்பந்து வீச்சாளர் அட்கின்சன் 5 விக்கெட்டும், ஜோஷ் டாங்கு 3 விக்கெட்டும் சாய்த்தனர்.

பின்னர் களமிறங்கிய இங்கிலாந்து அணி முதல் இன்னிங்சில் 51.2 ஓவர்களில் 247 ரன்னில் ஆல்-அவுட்டாகி, 23 ரன் முன்னிலை பெற்றது. அதிகபட்சமாக ஜாக் கிராவ்லி 64 ரன்களும், புரூக் 53 ரன்களும் அடித்தனர். நட்சத்திர வீரர் ஜோ ரூட் 29 ரன்களில் ஆட்டமிழந்தார். இந்திய தரப்பில் முகமது சிராஜ், பிரசித் கிருஷ்ணா தலா 4 விக்கெட்டுகள் வீழ்த்தினர்.

அடுத்து 23 ரன்கள் பின்தங்கிய நிலையில் 2-வது இன்னிங்சை தொடங்கிய இந்திய அணி 2-வது நாள் முடிவில் 2 விக்கெட்டுகளை இழந்து 75 ரன்கள் அடித்துள்ளது. ஜெய்ஸ்வால் 51 ரன்களுடனும், ஆகாஷ் தீப் 4 ரன்களுடனும் களத்தில் உள்ளனர். இந்தியா தற்போது வரை 52 ரன்கள் முன்னிலை பெற்றுள்ளது. இத்தகைய சூழலில் இன்று 3-வது நாள் ஆட்டம் நடைபெற உள்ளது.

இங்கிலாந்து அணியின் நட்சத்திர ஆட்டக்காரர் ஆன ஜோ ரூட் இந்த இன்னிங்சில் அடித்த 29 ரன்களையும் சேர்த்து உள்ளூரில் (இங்கிலாந்து) நடைபெற்ற சர்வதேச டெஸ்ட் போட்டிகளில் இதுவரை 7,220 ரன்கள் அடித்துள்ளார்.

இதன் மூலம் டெஸ்ட் கிரிக்கெட் வரலாற்றில் சொந்த மண்ணில் அதிக ரன் குவித்த வீரர்களின் மாபெரும் சாதனை பட்டியலில் சச்சினை (7,216 ரன்கள்) பின்னுக்கு தள்ளி 2-வது இடத்தை பிடித்துள்ளார். இந்த பட்டியலில் ரிக்கி பாண்டிங் (7,578 ரன்கள்) முதலிடத்தில் உள்ளார்.

அந்த பட்டியல்:

1. ரிக்கி பாண்டிங் - ஆஸ்திரேலியா - 7,578 ரன்கள்

2. ஜோ ரூட் - இங்கிலாந்து - 7,220 ரன்கள்*

3. சச்சின் - இந்தியா- 7,216 ரன்கள்

4. ஜெயவர்த்தனே - இலங்கை - 7,167 ரன்கள்

5. ஜாக் காலிஸ் - தென் ஆப்பிரிக்கா - 7,035 ரன்கள்