போலீஸ் அதிகாரி வீட்டில் ரூ.6½ லட்சம் நகை, பணம் கொள்ளை மர்மநபர்களுக்கு வலைவீச்சு

மாலேகாவ்,

போலீஸ் அதிகாரி வீட்டில் ரூ.6½ லட்சம் நகை, பணத்தை கொள்ளை அடித்துவிட்டு தப்பிச்சென்ற மர்மநபர்களை போலீசார் வலைவீசி தேடிவருகிறார்கள்.

நகை, பணம் கொள்ளை

ஜல்காவை அடுத்த கவ்லனே கிராமத்தை சேர்ந்தவர் பிரசாந்த் பச்சவ். இவர் கூடுதல் போலீஸ் சூப்பிரண்டாக பணிபுரிந்து வருகிறார். இவரது குடும்பத்தினர் நேற்று முன்தினம் இரவு வீட்டை பூட்டிவிட்டு வெளியே சென்றிருந்தனர். இந்தநிலையில் நள்ளிரவில் பிரசாந்த் பச்சவ் வீட்டின் பூட்டை உடைத்து உள்ளே நுழைந்த மர்மநபர்கள் பீரோவை உடைத்து அதில் இருந்த ரூ.6 லட்சத்து 50 ஆயிரம் மதிப்புள்ள தங்க நகைகள் மற்றும் பணத்தை கொள்ளையடித்து சென்றனர்.

இந்தநிலையில் நேற்று காலை வீடு திரும்பிய பிரசாந்த் பச்சவின் பெற்றோர் வீட்டின் பூட்டு உடைக்கப்பட்டு நகை, பணம் கொள்ளை போயிருந்ததை கண்டு அதிர்ச்சி அடைந்தனர்.

வலைவீச்சு

இது குறித்து அவர்கள் உடனடியாக அங்குள்ள போலீஸ் நிலையத்துக்கு தகவல் கொடுத்தனர். தகவலின்பேரில் போலீசார் சம்பவ இடத்திற்கு விரைந்து வந்து விசாரணை நடத்தினர். மேலும் சம்பவம் குறித்து வழக்குப்பதிவு செய்து, கொள்ளையில் தொடர்புடைய மர்மநபர்களை வலைவீசி தேடி வருகின்றனர்.

போலீஸ் அதிகாரி வீட்டிலேயே கொள்ளை நடந்திருப்பது அப்பகுதியில் பெரும் பரபரப்பை ஏற்படுத்தியுள்ளது.