மதுரை விமான நிலையத்தில் மு.க.ஸ்டாலின்– வைகோ சந்திப்பு

மதுரை,

பண மதிப்பிழப்பு நடவடிக்கையை கண்டித்து மதுரையில் தி.மு.க. சார்பில் நடைபெற உள்ள ஆர்ப்பாட்டத்தில் கலந்து கொள்வதற்காக தி.மு.க. செயல் தலைவர் மு.க.ஸ்டாலின் நேற்று இரவு 7.30 மணியளவில் விமானம் மூலம் மதுரை வந்தார்.

முன்னதாக சென்னை செல்வதற்காக ம.தி.மு.க. பொதுச்செயலாளர் வைகோ மதுரை விமான நிலையத்தில் இருந்தார். அவர் செல்ல இருந்த விமானம் இரவு 8.10 மணிக்கு புறப்பட இருந்தது. இந்த நிலையில் மதுரை விமான நிலையத்துக்கு மு.க.ஸ்டாலின் வந்திருந்ததை அறிந்த உடன், வரவேற்பு அறைக்கு வைகோ விரைந்தார். பின்னர் அங்கு வந்த மு.க.ஸ்டாலினை வைகோ சந்தித்தார். இருவரும் பரஸ்பரம் நலம் விசாரித்துக்கொண்டனர். ஒரு நிமிடம் நீடித்த இந்த சந்திப்புக்கு பின்னர் மு.க.ஸ்டாலின் வெளியே வந்து காரில் ஏறினார். ஆனால் அவருடன் வந்த உடமைகள் சோதனைக்கு உட்படுத்தப்பட்டு வெளியில் கொண்டு வர சுமார் 10 நிமிடங்கள் ஆனது. அதுவரை அவர் காரிலேயே அமர்ந்திருந்தார். பிறகு அங்கிருந்து புறப்பட்டு மதுரை மாட்டுத்தாவணி பகுதியில் உள்ள ஓட்டலுக்கு சென்று தங்கினார்.