விமானத்தில் ரூ.39½ லட்சம் தங்கம் கடத்தி வந்தவர் கைது

மும்பை,

மும்பை சர்வதேச விமான நிலையத்தில் நேற்று முன்தினம் துபாயில் இருந்து வந்த ஒரு விமானம் தரையிறங்கியது. அந்த விமானத்தில் தங்கம் கடத்தி வரப்படுவதாக சுங்கத்துறை அதிகாரிகளுக்கு தகவல் கிடைத்தது. இதையடுத்து அந்த விமானத்தில் வந்த பயணிகளின் உடைமைகளை அதிகாரிகள் சோதனையிட்டனர்.

இந்த சோதனையின் போது, ஒரு பயணி கொண்டு வந்த பைக்குள் கருப்பு டேப்பை கொண்டு சுற்றி மறைத்து வைக்கப்பட்டு இருந்த 5 தங்கக்கட்டிகளை அதிகாரிகள் கண்டுபிடித்து பறிமுதல் செய்தனர்.

பறிமுதல் செய்யப்பட்ட அந்த தங்கக்கட்டிகள் மதிப்பு ரூ.39 லட்சத்து 40 ஆயிரம் ஆகும். தங்கக்கட்டிகளை கடத்தி வந்த பயணியின் பெயர் சுதீப் என்பது தெரியவந்தது.

இதையடுத்து அதிகாரிகள் சுதீப்பை சகார் போலீசில் ஒப்படைத்தனர். போலீசார் அவரை கைது செய்தனர். மேலும் அவர் மீது வழக்குப்பதிவு செய்து, தீவிர விசாரணை நடத்தி வருகின்றனர்.