வீட்டின் பின் பக்க கதவை உடைத்து 40 பவுன் தங்க நகை-பணம் கொள்ளை

வடகாடு,

வடகாடு அருகே உள்ள சிக்கப்பட்டியை சேர்ந்தவர் சத்தியமூர்த்தி (வயது 65). விவசாயி. இவர் நேற்று சொந்த வேலையாக ஆலங்குடிக்கு புறப்பட்டு சென்றார். பின்னர் வீட்டில் இருந்த சத்தியமூர்த்தியின் குடும்பத்தினர் வீட்டை பூட்டிவிட்டு, வயலுக்கு சென்றனர். பின்னர் வயலுக்கு சென்றவர்கள் மீண்டும் வீட்டிற்கு வந்தனர். அப்போது அவர்கள் வீட்டின் பின்பக்க கதவு உடைக்கப்பட்டு இருப்பதை கண்டு அதிர்ச்சி அடைந்தனர்.

பின்னர் உள்ளே சென்று பார்த்தனர். அப்போது வீட்டின் பின்பக்க கதவை உடைத்து கொண்டு உள்ளே புகுந்த மர்மநபர்கள் வீட்டில் இருந்த பீரோவின் சாவியை எடுத்து, பீரோவை திறந்து, அதில் இருந்த 40 பவுன் தங்கநகைகள் மற்றும் ரூ.50 ஆயிரத்தை கொள்ளையடித்து விட்டு தப்பி சென்றது தெரியவந்தது. சத்தியமூர்த்தியின் உறவினர்கள் இது குறித்து வடகாடு போலீசுக்கு தகவல் தெரிவித்தனர்.

மர்மநபர்களுக்கு வலைவீச்சு

இதைத்தொடர்ந்து வடகாடு போலீசார் சம்பவ இடத்துக்கு வந்து விசாரணை நடத்தினார்கள். தொடர்ந்து தடயவியல் நிபுணர்கள் வரவழைக்கப்பட்டு, தடயங்களை சேகரித்தனர். மேலும் இந்த கொள்ளை சம்பவம் குறித்த புகாரின் பேரில் வீட்டின் பின்பக்க கதவை உடைத்து 40 பவுன் நகைகள் மற்றும் ரூ.50 ஆயிரத்தை கொள்ளையடித்து விட்டு, தப்பி சென்ற மர்மநபர்களை போலீசார் வலைவீசி தேடி வருகின்றனர். வடகாடு அருகே உள்ள சிக்கப்பட்டியில் விவசாயி வீட்டின் பின்பக்க கதவை உடைத்து பட்டப்பகலில் கொள்ளை சம்பவம் நடைபெற்று உள்ளதால், அந்த பகுதியில் உள்ள பொதுமக்கள் அச்சத்துடன் உள்ளனர்.