நெருலில் திருடன் என நினைத்து ஒருவர் அடித்துக் கொலை

மும்பை,

நவிமும்பை நெருலில் நியூ ஹாரிசன் சொசைட்டி அருகே நேற்று முன்தினம் அதிகாலை 3 மணி அளவில் ஒருவர் சந்தேகத்துக்கு இடமாக சுற்றிக்கொண்டிருந்தார். இதை அங்கு இரவு பணியில் இருந்த காவலாளி கவனித்து சந்தேகம் அடைந்தார். திருட்டு ஆசாமியாக இருக்கக்கூடும் என கருதிய அவர், இதுபற்றி குடியிருப்புவாசிகளிடம் தெரிவித்தார்.

இதனையடுத்து குடியிருப்புவாசிகள் திரண்டு வந்து அந்த நபரை பிடித்து விசாரித்தனர். அப்போது, அவர் சரியாக பதில் அளிக்கவில்லை. இதனால் கோபம் அடைந்த குடியிருப்புவாசிகளில் சிலர் உருட்டு கட்டையால் அவரை சரமாரியாக தாக்கி உள்ளனர்.

இதில், படுகாயமடைந்த அந்த நபர் மயங்கி விழுந்தார். இதுபற்றி தகவல் அறிந்ததும் நெருல் போலீசார் சம்பவ இடத்திற்கு விரைந்து வந்து, அந்த நபரை மீட்டு அருகில் உள்ள மருத்துவமனைக்கு கொண்டு சென்றனர்.

அங்கு பரிசோதனை செய்த டாக்டர்கள் அவர் இறந்து விட்டதாக தெரிவித்தனர். இதன்பேரில் போலீசார் கொலை வழக்கு பதிவு செய்து, அவரை தாக்கிய 4 பேரை கைது செய்தனர்.

போலீசார் நடத்திய விசாரணையில் பலியானவரின் பெயர் யூனுஸ் என்பது மட்டும் தெரியவந்துள்ளது. மேலும் அவர் யார்? எந்த பகுதியை சேர்ந்தவர்? என்பதை கண்டறிய போலீசார் தீவிர விசாரணை நடத்தி வருகின்றனர்.