அணைகளில் நீர் இருப்பு குறைவாக இருப்பதால் தமிழகத்திற்கு தண்ணீர் திறந்து விட சாத்தியமில்லை

பெங்களூரு,

கர்நாடகத்தில் காங்கிரஸ்– ஜனதாதளம்(எஸ்) கட்சிகள் கூட்டணி சார்பில் ஜனதாதளம்(எஸ்) மாநில தலைவர் குமாரசாமி வருகிற 23–ந் தேதி முதல்–மந்திரியாக பதவி ஏற்க உள்ளார்.

இந்த நிலையில், கர்நாடகத்தில் புதிய அரசு அமைய இருப்பதால் காவிரியில் இருந்து தமிழகத்திற்கு தண்ணீர் திறந்து விட வேண்டும் என்று நடிகர் ரஜினிகாந்த் வேண்டுகோள் விடுத்து இருப்பதாக கூறி, குமாரசாமியிடம் நேற்று பெங்களூருவில் நிருபர்கள் கேள்வி எழுப்பினர். இதற்கு பதிலளித்து அவர் கூறியதாவது:–

கர்நாடக அணைகளில் நீர் இருப்பு குறைவாக உள்ளது. அப்படி இருக்க தமிழகத்திற்கு தண்ணீர் திறந்து விட சாத்தியமில்லை. நான் ரஜினிகாந்திற்கு ஒரு வேண்டுகோள் விடுக்கிறேன். தயது செய்து நீங்கள் கர்நாடகத்திற்கு வாருங்கள். இங்குள்ள அணைகளின் நீர் இருப்பு பற்றி முதலில் அறிந்து கொள்ளுங்கள்.

எங்கள் மாநில விவசாயிகள் நிலை எப்படி இருக்கிறது என்பதையும் தெரிந்து கொள்ளுங்கள். அதன்பிறகு, கர்நாடக அணைகளில் இருந்து தண்ணீர் திறந்து விட வேண்டுமா? என்பது குறித்து பேச்சு வார்த்தை நடத்தி ஒரு முடிவுக்கு வரலாம்.

இவ்வாறு குமாரசாமி கூறினார்.