காங்கிரஸ்-ஜனதாதளம்(எஸ்) கூட்டணி ஒருங்கிணைப்பு குழு கூட்டம்

பெங்களூரு,


சித்தராமையா தலைமையில் ஏற்கனவே 2 முறை நடந்த ஒருங்கிணைப்பு குழு கூட்டத்தில் விவசாய கடன் தள்ளுபடி, காங்கிரஸ், ஜனதாதளம்(எஸ்) கட்சிகளின் தேர்தல் அறிக்கைகளில் உள்ள முக்கிய திட்டங்களை செயல்படுத்துவது உள்ளிட்ட முக்கிய முடிவுகள் எடுக்கப்பட்டன. இந்த நிலையில், 3-வது முறையாக அடுத்த வாரம் ஒருங்கிணைப்பு குழு கூட்டத்தை கூட்ட இரு கட்சிகளின் தலைவர்களும் முடிவு செய்துள்ளனர். அநேகமாக இந்த கூட்டம் வருகிற 30-ந் தேதி அல்லது 31-ந் தேதி பெங்களூருவில் சித்தராமையா தலைமையில் நடைபெற இருப்பதாக தகவல் வெளியாகியுள்ளது.

ஒருங்கிணைப்பு குழு கூட்டத்தை கூட்டுவதற்கு முக்கிய காரணமாக மந்திரிசபையில் காலியாக உள்ள பணி இடங்களை நிரப்புவது பற்றியும், வாரிய தலைவர்களை நியமிப்பது குறித்தும் விரிவாக ஆலோசனை நடத்தி முக்கிய முடிவு எடுக்க இரு கட்சி தலைவர்களும் தீர்மானித்திருப்பதாக தெரிகிறது. அத்துடன் மாவட்ட பொறுப்பு மந்திரிகள் நியமிப்பது தொடர்பாகவும் இரு கட்சிகளுக்கும் இடையே கருத்து வேறுபாடு ஏற்பட்டு இருப்பதாகவும், இதனால் மாவட்ட பொறுப்பு மந்திரிகளை நியமிப்பதில் காலதாமதம் ஆவதாகவும் சொல்லப்படுகிறது.

இதனால் சித்தராமையா தலைமையில் நடைபெற உள்ள ஒருங்கிணைப்பு கூட்டத்தில் காங்கிரஸ் கட்சியை சேர்ந்த மந்திரிகளுக்கு எந்த மாவட்டங்களை ஒதுக்கலாம், ஜனதாதளம்(எஸ்) கட்சியை சேர்ந்த மந்திரிகளுக்கு ஒதுக்கப்பட உள்ள மாவட்டங்கள் குறித்தும் விரிவாக ஆலோசனை நடத்தி முக்கிய முடிவு எடுக்க இருப்பதாக தகவல்கள் வெளியாகி உள்ளது.