பாராளுமன்ற தேர்தலில் தி.மு.க.வுக்கு உறுதுணையாக ம.தி.மு.க. இருக்கும் திருச்சியில் வைகோ பேட்டி

திருச்சி,

பேரிடர் காலங்களில் ம.தி.மு.க. சார்பில் பொதுமக்களுக்கு உதவிட ஆபத்து உதவி அணி என ஒரு அணி உருவாக்கப்பட்டுள்ளது. அதில் 400 இளைஞர்கள் உறுப்பினர்களாக உள்ளனர். அந்த அணிக்கான கலந்தாலோசனை கூட்டம் நேற்று திருச்சியில் நடைபெற்றது.

இந்த கூட்டத்தில் ம.தி.மு.க. பொதுச்செயலாளர் வைகோ பங்கேற்று, பேசினார். முன்னதாக அவர் நிருபர்களிடம் கூறியதாவது:–

தற்போது தமிழகத்தில் மிகவும் கவலை அளிக்கக்கூடிய செய்தி என்னவென்றால், விடுதலை சிறுத்தைகள் கட்சியின் பொதுச்செயலாளரும், தலைசிறந்த எழுத்தாளரும், முன்னாள் எம்.எல்.ஏ.வுமான ரவிக்குமார் உயிருக்கு ஆபத்து இருக்கிறது என உளவுத்துறை கூறி இருக்கிறது. இந்தியாவில் 34 பேரை கொலை செய்வதென்று திட்டம் தீட்டி இருப்பதாகவும், அதில் கர்நாடகா மாநிலத்தில் மட்டும் 8 பேரும், தமிழகத்தில் ரவிக்குமார் பெயரும் இருப்பதாக கூறப்பட்டுள்ளது. எனவே, அவர்களுக்கு உரிய பாதுகாப்பு வழங்க வேண்டும்.

பிரகடனம் செய்யப்படாத அவசர நிலை இந்தியாவில் நிலவுகிறது. நெருக்கடி காலத்தில் கூட சிறையில் தான் அடைத்தனர். ஆனால் தற்போது ஜனநாயகத்தின் குரல்வளையை நெரிக்கிற ஆபத்தான போக்கை மத்திய அரசு மேற்கொண்டுள்ளது. இது மதசார்பின்மைக்கான சவால் எனக் கருதுகிறேன்.