கோ-ஆப்டெக்சிற்கு தீபாவளி சிறப்பு விற்பனை இலக்காக ரூ.1 கோடியே 18 லட்சம் நிர்ணயம்

புதுக்கோட்டை,

புதுக்கோட்டை முக்கனி கோ-ஆப்டெக்ஸ் விற்பனை நிலையத்தில், தீபாவளி சிறப்பு விற்பனையின் தொடக்க விழா நடைபெற்றது. விழாவிற்கு கலெக்டர் கணேஷ் தலைமை தாங்கி, விற்பனையை தொடங்கி வைத்து பேசினார். அப்போது அவர் பேசியதாவது:-

தமிழக அரசின் கூட்டுறவு நிறுவனமான கோ-ஆப்டெக்ஸ் கடந்த 83 ஆண்டுகளாக தமிழக கைத்தறி நெசவாளர்கள் உற்பத்தி செய்யும் ரகங்களை கொள்முதல் செய்து இந்தியா முழுவதும் உள்ள கோ-ஆப்டெக்ஸ் விற்பனை நிலையங்கள் மூலமாக விற்பனை செய்து நெசவாளர்களுக்கு பேருதவி புரிந்து வருகிறது. காலத்திற்கேற்ற வகையில் புதிய உத்திகளைக் கையாண்டு பல புதிய வடிவமைப்புகளில் கோ-ஆப்டெக்ஸ் சேலைகள் மற்றும் இதர ரகங்கள் உற்பத்தி செய்யப்பட்டு விற்பனை செய்யப்படுகிறது.


தீபாவளி சிறப்பு விற்பனையின் கீழ் புதுக்கோட்டை மாவட்டத்தில் உள்ள கோ-ஆப்டெக்ஸ் விற்பனை நிலையங்களில் கடந்த ஆண்டு ரூ.94 லட்சத்து 79 ஆயிரம் விற்பனை செய்யப்பட்டது. தற்போதைய இலக்கு ரூ.1 கோடியே 18 லட்சம் நிர்ணயிக்கப்பட்டுள்ளது. எனவே பொதுமக்கள் அனைவரும் கோ-ஆப்டெக்சில் தங்களுக்கு தேவையான துணிகள் வாங்கி நெசவாளர் முன்னேற்றத்திற்கு துணை புரிய வேண்டும். இவ்வாறு அவர் கூறினார்.

இதில் கோ-ஆப்டெக்ஸ் மண்டல மேலாளர் மாணிக்கம், மேலாளர்கள் (வடிவமைப்பு மற்றும் உற்பத்தி) சீனிவாசன், சரவணன் (தணிக்கை), துணை மண்டல மேலாளர் அன்பழகன், நகராட்சி ஆணையர் (பொறுப்பு) ஜீவாசுப்பிரமணியன், வாடிக்கையாளர்கள், ஊழியர்கள் மற்றும் பொதுமக்கள் உள்பட பலர் கலந்து கொண்டனர்.