முதன்மை நிலை விளையாட்டு விடுதிகளுக்கு மாணவ-மாணவிகள் தேர்வு - கலெக்டர் சி.கதிரவன் தகவல்

ஈரோடு,

ஈரோடு மாவட்ட கலெக்டர் சி.கதிரவன் வெளியிட்டு உள்ள செய்திக்குறிப்பில் கூறி இருப்பதாவது:-

தமிழ்நாடு விளையாட்டு மேம்பாட்டு ஆணையத்தின் மூலமாக பள்ளிக்கூடங்களில் படிக்கும் மாணவ-மாணவிகளுக்கு விளையாட்டு துறையில் சாதனைகள் படைப்பதற்கு ஏற்ப நல்ல பயிற்சி, தங்கும் இட வசதி மற்றும் சத்தான உணவுடன் கூடிய 5 முதன்மை நிலை விளையாட்டு மைய விடுதிகள் செயல்பட்டு வருகின்றன.

அதன்படி சென்னை, திருச்சி, திருநெல்வேலி ஆகிய இடங்களில் மாணவர்களுக்கும், சென்னை, ஈரோடு ஆகிய இடங்களில் மாணவிகளுக்கும் முதன்மை நிலை விளையாட்டு மைய விடுதிகள் செயல்படுகிறது. இந்த விடுதிகளில் காலியாக உள்ள விளையாட்டு ஒதுக்கீட்டுக்கான இடங்களில் பயிற்சி பெற 6், 7 மற்றும் 8-ம் வகுப்புகளில் படிக்கும் மாணவ -மாணவிகளுக்கு மாநில அளவிலான தேர்வு வருகிற 21-ந் தேதி காலை 8 மணிக்கு சென்னையில் நடக்கிறது.

சென்னை ஜவஹர்லால் நேரு விளையாட்டு அரங்கில் தடகளம், இறகுபந்து, குத்துச்சண்டை, ஜிம்னாஸ்டிக், டென்னிஸ், நீச்சல் ஆகிய விளையாட்டிற்கு மாணவர்களும், இறகுபந்து, மேஜைப்பந்து, ஜிம்னாஸ்டிக்ஸ், தடகளம் ஆகிய விளையாட்டிற்கு மாணவிகளும் தேர்வு செய்யப்பட உள்ளனர்.

எனவே விளையாட்டில் சிறந்து விளங்கும் மற்றும் ஆர்வம் உள்ள மாணவ -மாணவிகள் சேர்க்கைக்கு உரிய படிவங்களை www.sdat.tn.gov.in என்ற இணையதள முகவரியில் இருந்து பதிவிறக்கம் செய்து கொள்ளலாம். தேசிய மற்றும் மாநில அளவில் வெற்றி பெற்ற மாணவர்களுக்கு முன்னுரிமை வழங்கப்படும். பூர்த்தி செய்யப்பட்ட விண்ணப்பங்களை வருகிற 20-ந் தேதி மாலை 5 மணிக்குள் ஆன்லைன் மூலம் சமர்ப்பிக்க வேண்டும்.

இவ்வாறு அந்த செய்திக்குறிப்பில் மாவட்ட கலெக்டர் சி.கதிரவன் தெரிவித்து உள்ளார்.