ஜெயங்கொண்டம் அருகே மடிக்கணினி வழங்காததை கண்டித்து முன்னாள் மாணவர்கள் சாலை மறியல்

ஜெயங்கொண்டம்,

அரியலூர் மாவட்டம், தா.பழூரை அடுத்த உதயநத்தம் கிராமத்தில் உள்ள அரசு மேல்நிலைப்பள்ளியில் கடந்த ஆண்டு பிளஸ்-2 படித்து முடித்த 69 மாணவர்களுக்கு விலையில்லா மடிக்கணினி வழங்கப்படவில்லை என்று கூறப்படுகிறது. இதனை கண்டித்து அரசு மேல்நிலைப்பள்ளி எதிரே உள்ள சிலால்- அணைக்கரை சாலையில் அமர்ந்து முன்னாள் மாணவ- மாணவிகள் நேற்று மறியல் போராட்டத்தில் ஈடுபட்டனர். தகவல் அறிந்து சம்பவ இடத்திற்கு விரைந்து வந்த தா.பழூர் போலீஸ் இன்ஸ்பெக்டர் ரஞ்சனா போராட்டத்தில் ஈடுபட்டவர்களிடம் பேச்சுவார்த்தை நடத்தினார். அப்போது சம்பந்தப்பட்ட துறை அதிகாரிகளிடம் இதுகுறித்து எடுத்துரைத்து விரைவில் உங்களுக்கு மடிக்கணினி வழங்கப்படும் என்று கூறினார். இதனை ஏற்றுக்கொண்ட முன்னாள் மாணவர்கள் போராட்டத்தை கைவிட்டு கலைந்து சென்றனர். இதனால் சிலால்- அணைக்கரை சாலையில் 1 மணி நேரம் போக்குவரத்து பாதிக்கப்பட்டது.