போலீஸ்-பொதுமக்கள் இடையே நல்லுறவை ஏற்படுத்துவேன் புதிதாக பொறுப்பேற்ற சூப்பிரண்டு பேட்டி

நாகப்பட்டினம்,

நாகை மாவட்ட போலீஸ் சூப்பிரண்டாக பணியாற்றிய ராஜசேகரன் சென்னை வடக்கு போக்குவரத்து துணை கமிஷனராக பணியிட மாற்றம் செய்யப்பட்டார். இதையடுத்து ராமநாதபுரம் மாவட்டம் கடலோர பாதுகாப்பு குழும சூப்பிரண்டாக பணியாற்றிய செல்வநாகரெத்தினம் நாகை மாவட்ட போலீஸ் சூப்பிரண்டாக நியமிக்கப்பட்டார். இதையடுத்து நேற்று நாகை போலீஸ் சூப்பிரண்டாக அவர் பொறுப்பேற்றார். அப்போது அவர் நிருபர்களிடம் கூறியதாவது:-

கட்டுக்குள் கொண்டு வருவேன்

போலீஸ்-பொதுமக்கள் இடையே நல்லுறவை ஏற்படுத்துவேன். நாகை மாவட்டத்தில் உள்ள பிரச்சினைகள், பொதுமக்கள் பிரச்சினைகள், சமூக பிரச்சினைகள் ஆகியவற்றை கண்காணித்து மாவட்டத்தில் சட்டம்-ஒழுங்கு சீர் குலைவு ஏற்படாமல் இருக்க நடவடிக்கை எடுக்கப்படும். மாவட்டத்தில் நிலவும் பிரச்சினைகளை கண்காணித்து, திட்டமிட்டு அதை கட்டுக்குள் கொண்டு வருவேன். மாவட்டத்தில் நிலவும் பிரச்சினைகளை தீர்க்க பொதுமக்கள் எந்த நேரமும் எனது தொலைபேசி எண் 9498111498-ஐ தொடர்பு கொள்ளலாம். மாவட்டத்தில் பணியாற்றும் மற்ற காவல்துறை நண்பர்களுடன் இணைந்து திறம்பட பணியாற்றுவேன்.

இவ்வாறு அவர் கூறினார்.