மயிலாடுதுறை அருகே கத்தியால் குத்தி டிரைவர் கொலை கணவன்- மனைவி கைது

திருவெண்காடு,

நாகை மாவட்டம் மயிலாடுதுறை அருகே உள்ள கண்டமங்கலம் கிராமத்தை சேர்ந்தவர் சாமிதுரை(வயது45). டிராக்டர் டிரைவர். இவருக்கும் அதே பகுதியை சேர்ந்த சண்முகம் (42) என்பவருடைய குடும்பத்துக்கும் நிலம் தொடர்பாக முன்விரோதம் இருந்து வந்ததாக கூறப்படுகிறது. சம்பவத்தன்று சாமிதுரை வீட்டுக்குள் இருந்த தனது மனைவியை திட்டிக்கொண்டிருந்தார். இதனைகேட்ட சண்முகம் தனது குடும்பத்தைதான் சாமிதுரை திட்டுவதாக நினைத்து சாமிதுரையை தட்டிக்கேட்டார். இதன் காரணமாக இரு குடும்பத்தினருக்கும் இடையே தகராறு ஏற்பட்டது.

கத்திக்குத்து

தகராறை தொடர்ந்து சாமிதுரை வயலுக்கு சென்று விட்டார். வயலில் இருந்து சாமிதுரை வீட்டுக்கு திரும்பியபோது சண்முகம் திடீரென அவரை வழிமறித்து கத்தியால் குத்தினார். இதில் ரத்த வெள்ளத்தில் கீழே விழுந்த சாமிதுரையை அக்கம்பக்கத்தில் இருந்தவர்கள் மீட்டு சீர்காழி அரசு மருத்துவமனைக்கு சிகிச்சைக்காக கொண்டு சென்றனர். ஆனால் மருத்துவமனைக்கு செல்லும் வழியிலேயே சாமிதுரை பரிதாபமாக இறந்தார். இதுகுறித்து தகவல் அறிந்த பாகசாலை போலீசார் சம்பவ இடத்துக்கு சென்று சாமிதுரையின் உடலை கைப்பற்றி பிரேத பரிசோதனைக்காக சீர்காழி அரசு மருத்துவமனைக்கு அனுப்பி வைத்தனர்.

கணவன்-மனைவி கைது

மேலும் இதுதொடர்பாக போலீசார் வழக்குப்பதிவு செய்து சண்முகம் மற்றும் கொலைக்கு உடந்தையாக இருந்ததாக அவருடைய மனைவி ராஜேஸ்வரி (40) ஆகிய 2 பேரையும் கைது செய்தனர். டிரைவர் கத்தியால் குத்தி கொலை செய்யப்பட்ட சம்பவம் அந்த பகுதியில் பரபரப்பை ஏற்படுத்தி உள்ளது.