கழுத்தை அறுத்து மனைவி படுகொலை கார் டிரைவர் கைது

வேப்பனப்பள்ளி,

கிருஷ்ணகிரி மாவட்டம் வேப்பனப்பள்ளி அருகே உள்ள கங்கோஜி கொத்தூர் கிராமத்தை சேர்ந்தவர் நடராஜன் (வயது 39), கார் டிரைவர். இவர் கடந்த சில ஆண்டுகளுக்கு முன்பு சென்னையை சேர்ந்த பிரியா (35) என்பவரை காதலித்து திருமணம் செய்து கொண்டார். இவர்களுக்கு 4 வயதில் கோயல் என்ற மகன் இருக்கிறான்.

பிரியா ஓசூரில் உள்ள ஒரு தனியார் ஆஸ்பத்திரியில் ஊழியராக வேலை பார்த்து வந்தார். இந்தநிலையில் கணவன், மனைவி இடையே குடும்பத்தகராறு காரணமாக பிரச்சினை ஏற்பட்டதாக தெரிகிறது. இதனால் கடந்த வாரம் பிரியா, நடராஜனுடன் கோபித்துக் கொண்டு வீட்டை விட்டு வெளியே ெசன்றதாக கூறப்படுகிறது.

கழுத்தை அறுத்து கொலை

இதைதொடர்ந்து நடராஜன், பிரியாவை தன்னுடன் குடும்பம் நடத்த வருமாறு அழைத்துள்ளார். இதையடுத்து அவர் தனது கணவர் வீட்டிற்கு வந்துள்ளார். நேற்று முன்தினம் இரவு மீண்டும் கணவன், மனைவி இடையே தகராறு ஏற்பட்டுள்ளது.

இதில் ஆத்திரம் அடைந்த நடராஜன் அருகில் கிடந்த கத்தியால் பிரியாவின் கழுத்தை அறுத்துள்ளார். இதில் அவர் துடி துடித்து பரிதாபமாக உயிரிழந்தார். இந்த சம்பவம் குறித்து அந்த பகுதியை சேர்ந்த பொதுமக்கள் நேற்று குருபரப்பள்ளி போலீஸ் நிலையத்திற்கு தகவல் தெரிவித்தனர்.

கைது

இதைத்தொடர்ந்து மாவட்ட கூடுதல் போலீஸ் சூப்பிரண்டு சக்திவேல், துணை போலீஸ் சூப்பிரண்டு குமார், போலீஸ் இன்ஸ்பெக்டர் ரஜினி மற்றும் போலீசார் சம்பவ இடத்திற்கு வந்து விசாரணை நடத்தினர். பின்னர் அவர்கள் பிரியாவின் உடலை மீட்டு பிரேத பரிசோதனைக்காக கிருஷ்ணகிரி அரசு ஆஸ்பத்திரிக்கு அனுப்பி வைத்தனர்.

மேலும் மனைவியை படுகொலை செய்த நடராஜனை கைது செய்து போலீசார் விசாரணை நடத்தி வருகின்றனர். இந்த சம்பவம் அந்த பகுதியில் பரபரப்பை ஏற்படுத்தியுள்ளது.