திருக்கோவிலூர் அருகே தொழிலாளி அடித்துக் கொலை 5 பேர் கைது

திருக்கோவிலூர்,

கள்ளக்குறிச்சி மாவட்டம் திருக்கோவிலூர் அருகே உள்ள மணலூர்பேட்டை அடுத்த ஜம்பை கிராமத்தை சேர்ந்தவர் பக்தவச்சலம் (வயது 50), தொழிலாளி. இவரது பக்கத்து வீட்டில் வசிப்பவர் ரேணு(45). வீட்டின் முன்பு உள்ள கால்வாயில் கழிவுநீர் செல்வது தொடர்பாக பக்தவச்சலம், ரேணு ஆகியோருக்கிடையே தகராறு ஏற்பட்டு, முன்விரோதம் இருந்து வந்தது.

இந்நிலையில் நேற்று முன்தினம் காலை அவர்களுக்கிடையே மீண்டும் தகராறு ஏற்பட்டது. இதில் ஆத்திரமடைந்த ரேணு, அவரது மனைவி கோவிந்தம்மாள்(40), மகன் முருகன்(20), மகள் அஞ்சலைதேவி(19) மற்றும் ரேணுவின் மாமனாரான திருவண்ணாமலை மாவட்டம் சு.வாளவெட்டி கிராமத்தை சேர்ந்த சதானந்தம்(65) ஆகியோர் பக்தவச்சலத்தை அடித்தனர். இதில் அவர் நிலை தடுமாறி வீட்டு வாசற்படியில் விழுந்தார்.

5 பேர் கைது

இதில் தலையில் பலத்த அடிபட்ட பக்தவச்சலத்தை அக்கம், பக்கத்தினர் மீட்டு சிகிச்சைக்காக மணலூர்பேட்டை அரசு ஆரம்ப சுகாதார நிலையத்திற்கு அழைத்து சென்றனர். பின்னர் மேல் சிகிச்சைக்காக திருவண்ணாமலை அரசு மருத்துவக்கல்லூரி மருத்துவமனைக்கு கொண்டு சென்றனர். அங்கு அவரை பரிசோதித்த டாக்டர்கள், ஏற்கனவே பக்தவச்சலம் இறந்துவிட்டதாக தெரிவித்தனர்.

இதுகுறித்த புகாரின் பேரில் திருக்கோவிலூர் துணை போலீஸ் சூப்பிரண்டு மகேஷ், இன்ஸ்பெக்டர் செல்வம், சப்-இன்ஸ்பெக்டர் ராஜசேகர் மற்றும் போலீசார் சம்பவ இடத்துக்கு விரைந்து சென்று விசாரணை நடத்தினர். பின்னர் பக்தவச்சலத்தை அடித்து கொலை செய்ததாக ரேணு, சதானந்தம், கோவிந்தம்மாள், முருகன், அஞ்சலைதேவி ஆகியோர் மீது போலீசார் வழக்குப்பதிவு செய்து, அவர்களை கைது செய்தனர். ஊரடங்குக்கு மத்தியில் தொழிலாளி அடித்துக் கொலை செய்யப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.