தமிழகத்தில் இதுவரை 40 லட்சத்து 63 ஆயிரம் பேருக்கு கொரோனா பரிசோதனை சுகாதாரத்துறை தகவல்

சென்னை,

தமிழகத்தில் நேற்றைய (ஞாயிற்றுக்கிழமை) கொரோனா பாதிப்பு குறித்து சுகாதாரத்துறை வெளியிட்டுள்ள செய்திக்குறிப்பில் கூறப்பட்டிருப்பதாவது:-

தமிழகத்தில் நேற்று 68 ஆயிரத்து 111 பேருக்கு கொரோனா பரிசோதனை மேற்கொள்ளப்பட்டது. இதில் 3,650 ஆண்கள், 2,325 பெண்கள் என மொத்தம் 5,975 பேருக்கு கொரோனா உறுதி செய்யப்பட்டுள்ளது. இந்த பட்டியலில், வெளிமாநிலங்களில் இருந்து வந்த 33 பேரும், 12 வயதுக்கு உட்பட்ட 212 பேரும், 60 வயதுக்கு மேற்பட்ட 849 முதியவர்களும் இடம்பெற்றுள்ளனர். நேற்று அனைத்து மாவட்டங்களிலும் புதிய தொற்று பாதிப்பு ஏற்பட்டு உள்ளது.

அதிகபட்சமாக சென்னையில் 1,298 பேரும், கோவையில் 392 பேரும், கடலூரில் 380 பேரும், குறைந்தபட்சமாக தர்மபுரியில் 12 பேரும், விருதுநகரில் 10 பேரும் பாதிக்கப்பட்டு உள்ளனர். தமிழகத்தில் இதுவரை 40 லட்சத்து 63 ஆயிரத்து 624 பேருக்கு கொரோனா பரிசோதனை மேற்கொள்ளப்பட்டு உள்ளது.

இதில் 3 லட்சத்து 79 ஆயிரத்து 385 பேருக்கு தொற்று உறுதி செய்யப்பட்டு உள்ளது. அந்த வகையில் இந்த பட்டியலில் 2 லட்சத்து 29 ஆயிரத்து 68 ஆண்களும், 1 லட்சத்து 50 ஆயிரத்து 288 பெண்களும், 3-ம் பாலினத்தவர் 29 பேரும் அடங்குவர். அதில் 12 வயதுக்கு உட்பட்ட 17 ஆயிரத்து 928 குழந்தைகளும், 60 வயதுக்கு மேற்பட்ட 48 ஆயிரத்து 497 முதியவர்களும் இடம் பெற்றுள்ளனர்.

97 பேர் உயிரிழப்பு

கொரோனாவுக்கு அரசு ஆஸ்பத்திரியில் 76 பேரும், தனியார் மருத்துவமனையில் 21 பேரும் என 97 பேர் சிகிச்சை பலனின்றி நேற்று உயிரிழந்துள்ளனர். இதில் சென்னையில் 19 பேரும், சேலத்தில் 8 பேரும், தேனியில் 7 பேரும், வேலூரில் 6 பேரும், திருவள்ளூரில் 5 பேரும், செங்கல்பட்டு, நெல்லையில் தலா 4 பேரும், விருதுநகர், திருச்சி, திருவாரூர், தஞ்சாவூர், தென்காசி, சிவகங்கை, நீலகிரி, மதுரை, காஞ்சீபுரம், திண்டுக்கலில் தலா 3 பேரும், கோவை, கடலூர், ஈரோடு, ராணிப்பேட்டையில் தலா இருவரும், திருப்பத்தூர், பெரம்பலூர், நாகப்பட்டினம், கரூர், கள்ளக்குறிச்சி, கன்னியாகுமரியில் தலா ஒருவரும் என 27 மாவட்டங்களில் உயிரிழப்பு நிகழ்ந்து உள்ளது. இதுவரையில் தமிழகத்தில் 6 ஆயிரத்து 517 பேர் கொரோனா நோய் தொற்றால் உயிரிழந்துள்ளனர்.

கொரோனா பாதிப்பில் இருந்து நேற்று 6 ஆயிரத்து 47 பேர் பூரண குணமடைந்து வீடு திரும்பி உள்ளனர். இதில் அதிகபட்சமாக சென்னையில் 1,040 பேரும், செங்கல்பட்டில் 483 பேரும், கோவையில் 444 பேரும் அடங்குவர். இதுவரையில் 3 லட்சத்து 19 ஆயிரத்து 327 பேர் குணம் அடைந்து உள்ளனர். சிகிச்சையில் 53 ஆயிரத்து 541 பேர் உள்ளனர்.

பாதிப்பு

தமிழகத்துக்கு வெளிநாடுகளில் இருந்து சிறப்பு விமானம் மூலம் வந்த 896 பேரும், வெளிமாநிலங்களில் இருந்து விமானம் மூலம் வந்த 779 பேரும், ரெயில் மூலம் வந்த 428 பேரும், சாலை மார்க்கமாக வந்த 3 ஆயிரத்து 987 பேரும், கடல் மார்க்கமாக வந்த 34 பேர் என மொத்தம் 6 ஆயிரத்து 124 பேர் கொரோனாவால் பாதிக்கப்பட்டு உள்ளனர்.

இவ்வாறு அதில் கூறப்பட்டுள்ளது.