நெல்லை, தூத்துக்குடி, தென்காசியில் புதிதாக 235 பேருக்கு கொரோனா தொற்று

தூத்துக்குடி,

நெல்லை மாவட்டத்தில் நேற்று புதிதாக 132 பேருக்கு கொரோனா பாதிப்பு ஏற்பட்டு உள்ளது. இதில் பாளையங்கோட்டை புறநகர் பகுதியில் உள்ள ஒரு தனியார் நிறுவனத்தில் பணியாற்றும் ஊழியர்கள் 8 பேருக்கு பாதிப்பு கண்டறியப்பட்டது. இதைத்தொடர்ந்து அவர்களுடன் பணியாற்றியவர்களுக்கு கொரோனா பரிசோதனை செய்யப்பட்டது. அவர்கள் பணியாற்றிய பகுதியில் கிருமி நாசினி தெளிக்கப்பட்டது. ஒரே குடும்பத்தை சேர்ந்த 4 பேர் கொரோனாவால் பாதிக்கப்பட்டன. நெல்லை மாநகர் பகுதியில் மட்டும் 40 பேருக்கு தொற்று ஏற்பட்டு உள்ளது.

நாங்குநேரி பகுதியில் 13 பேர், சேரன்மாதேவி பகுதியில் 5 பேர், களக்காடு பகுதியில் 17 பேர், மானூர் பகுதியில் 19 பேர், ராதாபுரம் பகுதியில் 4 பேர், வள்ளியூர் பகுதியில் 5 பேர், அம்பை பகுதியில் 8 பேர், பாளையங்கோட்டை புறநகர் பகுதியில் 11 பேர், பாப்பாக்குடி பகுதியில் 4 பேர் என உள்பட 132 பேருக்கு கொரோனா தொற்று உறுதி செய்யப்பட்டு உள்ளது.

2 பேர் பலி

இவர்கள் பாளையங்கோட்டை ஐகிரவுண்டு அரசு ஆஸ்பத்திரி மற்றும் தனியார் ஆஸ்பத்திரிகள் என நெல்லை மாவட்டத்தில் கொரோனா சிகிச்சை அளிக்கப்படுகின்ற 11 ஆஸ்பத்திரிகளில் கொரோனா வார்டில் சிகிச்சை பெற்று வருகிறார்கள். நேற்றுடன் கொரோனாவால் பாதிக்கப்பட்டவர்களின் எண்ணிக்கை 10 ஆயிரத்து 315-ஆக அதிகரித்து உள்்ளது.

இவர்களில் 8 ஆயிரத்து 957 பேர் சிகிச்சை முடிந்து வீடு திரும்பி உள்ளனர். 1,171 பேர் சிகிக்சை பெற்று வருகிறார்கள். நெல்லை மாவட்டத்தில் நேற்று 2 முதியவர்கள் கொரோனாவால் பலியாகி உள்ளனர். இதனால் மாவட்டத்தில் இறந்தவர்கள் எண்ணிக்கை 187-ஆக உயர்ந்து உள்ளது.

தென்காசி-தூத்துக்குடி

தென்காசி மாவட்டத்தில் நேற்று அரசு ஊழியர்கள் உள்பட 53 பேருக்கு கொரோனா தொற்று கண்டறியப்பட்டு உள்ளது. இதனால் பாதிக்கப்பட்டவர்களின் எண்ணிக்கை 5 ஆயிரத்து 812-ஆக உயர்ந்து உள்ளது. 683 பேர் சிகிச்சை பெற்று வருகிறார்கள். 108 பேர் இறந்து உள்ளனர்.

தூத்துக்குடி மாவட்டத்தில் நேற்று 50 பேர் கொரோனாவால் பாதிக்கப்பட்டு உள்ளனர். இதனால் மாவட்டத்தில் கொரோனாவால் பாதிக்கப்பட்டவர்கள் எண்ணிக்கை 11 ஆயிரத்து 738-ஆக அதிகரித்து உள்ளது. இதுவரை 10 ஆயிரத்து 961 பேர் முழுமையாக குணமடைந்து வீடு திரும்பி உள்ளனர். 662 பேர் தொடர்ந்து சிகிச்சை பெற்று வருகின்றனர். மாவட்டத்தில் இதுவரை 116 பேர் கொரோனாவால் பாதிக்கப்பட்டு இறந்து உள்ளனர்.