தேசிய நெடுஞ்சாலையை மாற்று வழியில் அமைக்க வேண்டும் கலெக்டரிடம், கிராம மக்கள் கோரிக்கை

நாகப்பட்டினம்,

நாகை கலெக்டர் அலுவலகத்தில் தணயுடையவர் கோவில்பத்து ஊராட்சி மன்ற தலைவர் கரிகாலன் தலைமையில் அப்பகுதி மக்கள் ஒரு கோரிக்கை மனு அளித்தனர். அந்த மனுவில் கூறியிருப்பதாவது:-

தணயுடையவர் கோவில்பத்து ஊராட்சியில் தலைச்சங்காடு கிராமம் உள்ளது. இங்கு விழுப்புரம் தொடங்கி நாகை வழியாக தூத்துக்குடி வரை செல்லும் தேசிய நெடுஞ்சாலை பணிகள் நடந்து வருகிறது. இந்தநிலையில் தலைச்சங்காடு கிராமம் மெயின்ரோட்டில் 2 பகுதிகளிலும் பல ஆண்டுகளாக இருந்த இரண்டு பெரிய குளங்கள், ஊராட்சி ஒன்றிய நடுநிலைப்பள்ளிக்கு சொந்தமான 2 கட்டிடங்கள், பழமை வாய்ந்த 3 கோவில்கள், சுடுகாடு உள்ளிட்டவைகள் அழிக்கப்பட்டு சாலை போடப்பட உள்ளது.

மாற்று வழியில் அமைக்க வேண்டும்

மேலும் 120-க்கும் மேற்பட்ட குடும்பங்கள் வசித்து வரும் வீடுகளும் இடிக்கப்பட உள்ளது. இந்த கோரிக்கையை வலியுறுத்தி கடந்த 2018-ம் ஆண்டு கிராம மக்கள் சார்பில் பலமுறை மனு கொடுத்துள்ளோம். இதுவரை நடவடிக்கை எடுக்கவில்லை. எனவே தேசிய நெடுஞ்சாலையை மாற்று வழியில் அமைத்து தர உரிய நடவடிக்கை எடுக்க வேண்டும்.

இவ்வாறு அதில் கூறப்பட்டுள்ளது.