சென்னை கடற்கரை-அரக்கோணம் செல்லும் ரெயிலை திருத்தணி வரை நீட்டிக்க வேண்டும்: எஸ்.ஜெகத்ரட்சன் எம்.பி. மனு

புதுடெல்லி,

அரக்கோணம் தொகுதியின் தி.மு.க. எம்.பி. எஸ்.ஜெகத்ரட்சகன், ரெயில்வே வாரிய தலைவர் வினோத்குமார் யாதவை டெல்லியில் சந்தித்து பேசினார். அப்போது எஸ்.ஜெகத்ரட்சகன் கோரிக்கை மனு ஒன்றையும் அவரிடம் கொடுத்தார்.

ஜெகத்ரட்சகன் எம்.பி. கொடுத்த அந்த மனுவில் கூறியிருப்பதாவது:-

சென்னை கடற்கரை ரெயில் நிலையத்தில் இருந்து அரக்கோணம் வரையில் இயக்கப்படும் மின்சார ரெயிலை (வ.எண்.40903/40904) திருத்தணி வரையிலும் நீட்டிக்க வேண்டும். இந்த ரெயிலை சென்னை-திருத்தணி (வ.எண்.43505) ரெயிலின் முந்தைய கால அட்டவணைக்கு கொண்டுவர வேண்டும். சென்னை சென்டிரல்-பெங்களூரு இடையே தினசரி செல்லும் எக்ஸ்பிரஸ் ரெயில் இயக்கப்படும் என்று கடந்த 2014-15-ம் ஆண்டு அறிவிக்கப்பட்டது. அறிவித்தப்படி இதனை இயக்க வேண்டும்.

சென்னை-பெங்களூரு இடையேயான ரெயில் (வ.எண்.22625/22626) வாலாஜாரோடு ரெயில் நிலையத்தில் நின்று செல்ல நடவடிக்கை எடுக்க வேண்டும். என்னுடைய நாடாளுமன்ற தொகுதிக்கு உட்பட்ட மக்களின் நலன் கருதி உங்களிடம் இந்த கோரிக்கைகளை முன்வைத்திருக்கிறேன்.

இவ்வாறு அதில் கூறப்பட்டுள்ளது.