தொழில் அதிபர் முகேஷ் அம்பானிக்கு மீண்டும் கொலை மிரட்டல்

மும்பை

உலக பெரும் பணக்காரர்களில் ஒருவரான முகேஷ் அம்பானி மும்பையில் தனது குடும்பத்தினருடன் வசித்து வருகிறார். இந்த நிலையில், கடந்த வெள்ளிக்கிழமை முகேஷ் அம்பானியின் நிறுவனத்துக்கு இ-மெயில் ஒன்று வந்தது. அதில் ரூ.20 கோடி கேட்டு முகேஷ் அம்பானிக்கு கொலை மிரட்டல் விடுக்கப்பட்டு இருந்தது. பணத்தை கொடுக்கவில்லை என்றால் முகேஷ் அம்பானியை கொலை செய்து விடுவதாக என மர்ம நபர் மின்னஞ்சலில் மிரட்டல் விடுத்து இருந்தார்.

கொலை மிரட்டல் இ-மெயில் குறித்து காம்தேவி போலீசில் அண்டிலா பாதுகாப்பு அதிகாரி புகார் அளித்தார். அந்த புகாா் குறித்து போலீசார் வழக்குப்பதிவு செய்து விசாரணை நடத்தி வருகின்றனர். பின்னர் மறுநாளே 200 கோடி கேட்டு மீண்டும் ஒரு கொலை மிரட்டல் வந்தது. இந்தநிலையில் 3-வது முறையாக இ-மெயிலில் முகேஷ் அம்பானிக்கு கொலை மிரட்டல் விடுக்கப்பட்டுள்ளது. இந்த முறை மர்ம நபர் ரூ.400 கோடி கேட்டு கொலை மிரட்டல் விடுத்து உள்ளார்.