பா.ஜ.க.வின் 44-வது நிறுவன நாள்; கட்சி அலுவலகம் அருகே சுவரில் தாமரை சின்னம் வரைந்த தமிழக பா.ஜ.க. தலைவர்

சென்னை,

பா.ஜ.க.வின் 44-வது நிறுவன நாள் இன்று கொண்டாடப்படுகிறது. இதனை முன்னிட்டு நாட்டின் தலைநகர் டெல்லியில் உள்ள கட்சி அலுவலகத்தில் பா.ஜ.க. தேசிய தலைவர் ஜே.பி. நட்டா கட்சி கொடியை ஏற்றினார். இந்த நிகழ்ச்சியில் கட்சியின் நிர்வாகிகள், தொண்டர்கள் உள்ளிட்டோர் கலந்து கொண்டனர்.

சமீபத்தில் டெல்லியில், புதிதாக கட்டப்பட்ட பா.ஜ.க. மத்திய அலுவலக (விரிவாக்கம்) திறப்பு விழாவில் பிரதமர் மோடி கலந்து கொண்டு கட்டிடங்களை திறந்து வைத்து பேசினார்.

அப்போது அவர், 1984-ம் ஆண்டில் 2 மக்களவை தொகுதிகளுடன் தொடங்கிய கட்சியின் பயணம், பின்னர் 2019-ம் ஆண்டில் 303 தொகுதிகளாக அதன் வெற்றி அமைந்து உள்ளது. அது எண்ணம் மற்றும் கருத்துகளின் விரிவாக்கத்திற்கான ஊக்கமளிக்கும் பயணம் ஆக இருந்துள்ளது.

இது ஒரு கட்டிடத்தின் விரிவாக்கம் என்றில்லாமல், ஒவ்வொரு தொண்டரின் எண்ணங்களின் விரிவாக்கமும் கூட ஆகும். கோடிக்கணக்கான தொண்டர்கள் மற்றும் கட்சியின் நிறுவன உறுப்பினர்களின் முன் தலை வணங்குகிறேன் என பேசினார்.

பா.ஜ.க.வின் 44-வது நிறுவன நாளை முன்னிட்டு நாடு முழுவதும் அக்கட்சியினர் கொண்டாட்டத்தில் ஈடுபட்டு வருகின்றனர். கொளுத்தும் வெயிலையும் கவனத்தில் கொள்ளாமல் உற்சாகமுடன் அதனை கொண்டாடி வருகின்றனர்.

இதேபோன்று, சென்னையில் பா.ஜ.க.வின் கட்சி அலுவலகம் அருகே உள்ள சுவரில் தமிழக பா.ஜ.க. தலைவர் அண்ணாமலை, அக்கட்சியின் தாமரை சின்னம் உருவம் ஒன்றை வண்ணம் தீட்டி, வரைந்து உள்ளார். உடன் அக்கட்சியின் முக்கிய நிர்வாகிகள் மற்றும் தொண்டர்கள் இருந்தனர்.