பெங்களூரு,

பா.ஜனதா தேசிய பொதுச்செயலாளரும், சிக்கமகளூரு தொகுதி எம்.எல்.ஏ.வுமான சி.டி.ரவி நேற்று கர்நாடக மாநிலம் உப்பள்ளி பகுதிக்கு சென்றார். அங்கு பா.ஜனதா பிரமுகர்களை சந்தித்து, பின்னர் செய்தியாளர்களுக்கு பேட்டியளித்தார்.

அப்போது அவர் கூறியதாவது;-

"காங்கிரஸ் கட்சி இந்தியாவில் மீண்டும் ஆட்சியை பிடிக்க போராடி வருகிறது. காங்கிரசுக்கு சமூகநீதி, நியாயம் எதுவும் கிடையாது. குடும்ப அரசியல் தான் காங்கிரசின் ஜனநாயகம். காங்கிரசில் குடும்ப உறுப்பினர்கள் தான் தேசிய தலைவர்களாக உள்ளனர்.

பா.ஜனதாவில் 3 ஆண்டுகளுக்கு ஒருமுறை தேர்தல் நடத்தி தலைவரை தேர்ந்தெடுக்கிறோம். பிரதமர் மோடிக்கு மக்கள் மத்தியில் செல்வாக்கு அதிகரித்து கொண்டே செல்கிறது. மீண்டும் அவர் பிரதமர் ஆவது உறுதி. கர்நாடகத்தில் தனி பெரும்பான்மையுடன் வெற்றி பெற்று மீண்டும் ஆட்சியை பிடிப்போம்."

இவ்வாறு அவர் கூறினார்.