கேரளாவில் 12 ஆயிரத்துக்கும் அதிகமானோருக்கு காய்ச்சல் பாதிப்பு - 96 பேருக்கு டெங்கு உறுதி

திருவனந்தபுரம்,

கேரள மாநிலத்தில் கடந்த சில நாட்களாக பல வகை காய்ச்சல் பாதிப்பினால் மருத்துவமனையில் சிகிச்சை பெறும் மக்களின் எண்ணிக்கை தொடர்ந்து அதிகரித்து வருகிறது. கடந்த ஒரு மாதத்தில் காய்ச்சல் பாதிப்பால் மாநிலம் முழுவதும் உள்ள மருத்துவமனைகளில் 2 லட்சத்திற்கும் அதிகமானோர் சிகிச்சை பெற்றுள்ளனர்.

இந்த நிலையில் நேற்று ஒரே நாளில் 12,965 பேர் காய்ச்சல் பாதிப்பிற்கு சிகிச்சை பெற்றதாகவும், இதில் 96 பேருக்கு டெங்கு பாதிப்பு உறுதி செய்யப்பட்டுள்ளதாகவும் கேரள சுகாதாரத்துறை தெரிவித்துள்ளது. இதில் 5 பேர் காய்ச்சல் பாதிப்பால் உயிரிழந்த நிலையில், 239 பேருக்கு டெங்கு அறிகுறிகள் இருப்பதாக தெரிவிக்கப்பட்டுள்ளது. இதில் கேரளாவின் மலப்புரம் மாவட்டத்தில் அதிக காய்ச்சல் பாதிப்புகள் பதிவாகி இருப்பது குறிப்பிடத்தக்கது.