ஜார்க்கண்ட்: சாலை தடுப்பு மீது கார் மோதி விபத்து - 6 பேர் பலி

ராஞ்சி,

ஜார்க்கண்ட் மாநிலம் ஜாம்ஷெட்பூர் நகரில் பிஸ்துபூர் காவல் நிலையம் அமைந்துள்ளது. இந்த காவல் நிலையப் பகுதிக்கு உட்பட்ட சர்க்யூட் ஹவுஸ் அருகே உள்ள சாலையில் இன்று அதிகாலை கார் சென்றுகொண்டிருந்தது. அந்த காரில் 8 பேர் பயணித்தனர்.

அதிகாலை 5 மணியளவில் அதிவேகமாக சென்றபோது கட்டுப்பாட்டை இழந்த கார் சாலையின் தடுப்புச்சுவர் மீது மோதியது. இந்த கோர விபத்தில் காரில் பயணித்த 5 பேர் சம்பவ இடத்திலேயே உயிரிழந்தனர்.

இந்த விபத்தில் படுகாயமடைந்த 3 பேரை அக்கம் பக்கத்தினர் மீட்டு அருகில் உள்ள மருத்துவமனையில் அனுமதித்தனர். படுகாயமடைந்தவர்களில் ஒருவர் மருத்துவமனையில் சிகிச்சை பலனின்றி உயிரிழந்தார். இதனால் விபத்தில் உயிரிழந்தோர் எண்ணிக்கை 6 ஆக அதிகரித்தது. எஞ்சிய 2 பேர் தீவிர சிகிச்சை பெற்று வருகின்றனர். இந்த விபத்து குறித்து போலீசார் வழக்குப்பதிவு செய்து விசாரணை நடத்தி வருகின்றனர்.