பெண் குளிப்பதை வீடியோ எடுத்த காவலாளி கைது

ஆடுகோடி:

பெங்களூரு ஆடுகோடி போலீஸ் எல்லைக்கு உட்பட்ட பகுதியில் தம்பதி வசித்து வருகின்றனர். அவர்களது வீட்டில் காவலாளியாக ராஜேந்திரன்(வயது 38) என்பவர் வேலை செய்து வருகிறார். இந்த நிலையில் வீட்டின் குளியலறையில் உரிமையாளரின் மனைவி குளித்து கொண்டிருந்தார். அவர் குளிப்பதை காவலாளி ராஜேந்திரன், செல்போனில் வீடியோ எடுத்துக் கொண்டிருந்தார். அதைப்பார்த்த உரிமையாளரின் மனைவி கூச்சலிட்டார்.

உடனே அவரது கணவர், ராஜேந்திரனை விரட்டி பிடித்தார். இதையடுத்து போலீசாருக்கு தகவல் தெரிவிக்கப்பட்டது. தகவலின் பேரில் போலீசார் சம்பவ இடத்திற்கு சென்று ராஜேந்திரனை கைது செய்தனர். அவரிடம் இருந்த செல்போனை போலீசார் பறிமுதல் செய்தனர். மேலும் அவர் மீது வழக்குப்பதிவு செய்து போலீசார் விசாரணை நடத்தி வருகின்றனர்.