துபாய், கொழும்பில் இருந்து காலணியில் மறைத்து கடத்திய ரூ.40 லட்சம் தங்கம் பறிமுதல்

ஆலந்தூர்,

சென்னை மீனம்பாக்கம் பன்னாட்டு விமான நிலையத்துக்கு கொழும்பு மற்றும் துபாயில் இருந்து 2 விமானங்கள் வந்தன. அவற்றில் வந்த பயணிகளை சுங்க இலாகா அதிகாரிகள் தீவிரமாக கண்காணித்தனர். அப்போது துபாய், கொழும்பில் இருந்து வந்த 6 பேரை சந்தேகத்தின்பேரில் நிறுத்தி சுங்க இலாகா அதிகாரிகள் விசாரித்தனர். அதிகாரிகளிடம் அவர்கள் முன்னுக்கு பின் முரணாக பேசியதால் அவர்களது உடமைகளை சோதனை செய்தனர்.

அதில் ரூ.5 லட்சத்து 17 ஆயிரம் மதிப்புள்ள எலக்ட்ரானிக் பொருட்கள் இருந்தன. அவற்றை சுங்க இலாகா அதிகாரிகள் பறிமுதல் செய்தனர்.

காலணியில் தங்கம்

மேலும் அவர்கள் 6 பேரும் அணிந்து இருந்த காலணி சற்று வித்தியாசமாக இருந்ததால் அவற்றை வாங்கி சோதித்தனர். அதில் காலணியின் அடிப்பகுதியில் தங்க கட்டிகளை மறைத்து வைத்து கடத்தி வந்ததை கண்டு பிடித்தனர். அவர்களிடம் இருந்து ரூ.40 லட்சத்து 28 ஆயிரம் மதிப்புள்ள 928 கிராம் தங்கத்தை கைப்பற்றினார்கள்.

சென்னை விமான நிலையத்தில் 6 பேரிடம் இருந்து ரூ.45 லட்சத்து 45 ஆயிரம் மதிப்புள்ள 928 கிராம் தங்கம் மற்றும் எலக்ட்ரானிக் பொருட்களை பறிமுதல் செய்த சுங்க இலாகா அதிகாரிகள், இது தொடர்பாக 6 பேரிடமும் விசாரித்து வருகின்றனர்.