எல்லை தாண்டி வந்து மீன்பிடித்ததாக தமிழக மீனவர்கள் 16 பேர் சிறைபிடிப்பு

ராமேசுவரம்,

ராமேசுவரத்தில் இருந்து நேற்று முன்தினம் 600-க்கும் அதிகமான விசைப்படகுகளில், 2 ஆயிரத்துக்கும் மேற்பட்ட மீனவர்கள் மீன்பிடிக்க கடலுக்கு சென்றனர். அவர்கள் கச்சத்தீவுக்கும்-தனுஷ்கோடிக்கும் இடைப்பட்ட கடல் பகுதியில் மீன்பிடித்து கொண்டிருந்தனர்.

ராமேசுவரம் தங்கச்சிமடம் விக்டோரியா நகர் பகுதியை சேர்ந்த அந்தோணி எடிசன் என்வருக்கு சொந்தமான விசைப்படகில் அந்தோணி லிவிங்ஸ்டன், மெஜோ, மரிய டேனிஸ்டைன், சியோன், ராபர்ட் கிளைவ், கெல்மன்ராஜ், சகாய சுபாஷ், ஜெபமாலை, கிளின்டன், நிலவன், சந்தியா, பிரான்சிஸ் பிரகாஷ் ஆகிய 12 மீனவர்கள் இருந்தனர்.

அவர்களை எல்லை தாண்டி வந்து மீன்பிடித்ததாக கூறி இலங்கை கடற்படையினர் கைது செய்ததுடன், அவர்கள் இருந்த விசைப்படகையும் பறிமுதல் செய்து, மன்னார் கடற்படை முகாமுக்கு கொண்டு சென்று விசாரணை நடத்தினர். தொடர்ந்து கிளிநொச்சி கோர்ட்டில் ஆஜர்படுத்தபட்ட அவர்களை, வருகிற 7-ந் தேதி வரை சிறையில் அடைக்க நீதிபதி உத்தரவிட்டார். அதைதொடர்ந்து யாழ்ப்பாணம் சிறையில் 12 பேரும் அடைக்கப்பட்டனர்.

மண்டபம் மீனவர்கள்

இதேபோல் மண்டபம் பகுதியில் இருந்து மீன்பிடிக்க சென்ற ஒரு விசைப்படகு, அதில் இருந்த சதீஷ், வேலாயுதம், ராஜாக்கனி, விசார் அலி என 4 மீனவர்களையும் எல்லை தாண்டி வந்து மீன் பிடித்ததாக கூறி இலங்கை கடற்படையினர் சிறைபிடித்தனர். பின்னர் 4 பேரும் கைது செய்யப்பட்டு, ஊர்க்காவல் துறை கோர்ட்டில் ஆஜர்படுத்தப்பட்டு யாழ்ப்பாணம் சிறையில் அடைக்கப்பட்டனர்.