தமிழகத்தில் கலை மற்றும் அறிவியல் கல்லூரி மாணவர் சேர்க்கை - சுமார் 3 லட்சம் பேர் விண்ணப்பம்

சென்னை,

தமிழ்நாட்டில் உள்ள 164 அரசு கலை மற்றும் அறிவியல் கல்லூரிகளில் உள்ள 1 லட்சத்து 7 ஆயிரத்து 395 இளநிலை பட்டப்படிப்புகளில் சேர இதுவரை 1 லட்சத்து 28 ஆயிரத்து 274 மாணவிகள், 1 லட்சத்து 15 ஆயிரத்து 752 மாணவர்கள், 78 திருநங்கைகள் உள்பட 2 லட்சத்து 99 ஆயிரத்து 558 பேர் விண்ணப்பித்துள்ளனர்.

இதில் அரசு பள்ளியில் படித்த 54,638 மாணவிகள் விண்ணப்பம் செய்துள்ள நிலையில், இவர்களுக்கு தமிழக அரசின் புதுமைப்பெண் திட்டத்தின் கீழ் கல்லூரியில் சேர்ந்தால் மாதம் ரூ.1,000 நிதி உதவி வழங்கப்பட உள்ளது குறிப்பிடத்தக்கது.

மேலும் தமிழ் மொழி பட்டப்படிப்புக்கு தமிழ் மொழியில் பயின்றவர்களுக்காக தனி தரவரிசைப் பட்டியலும், ஆங்கில மொழி பட்டப்படிப்புக்கு ஆங்கில பாடத்தில் பெற்ற மதிப்பெண்கள், பிற இளநிலை பட்டப்படிப்புகளுக்கு மற்ற 4 பாடங்களில் பெற்ற மதிப்பெண்கள் அடிப்படையில் தனி தரவரிசைப் பட்டியலும் வெளியிடப்பட உள்ளது.

கல்லூரி வாரியாக தரவரிசைப் பட்டியல் தயார் செய்யப்பட்டு 25-ந்தேதி கல்லூரி கல்வி இயக்குனர் அலுவலகத்தில் இருந்து அனுப்பி வைக்கப்படும் என்று தெரிவிக்கப்பட்டுள்ளது. சிறப்பு ஒதுக்கீட்டு பிரிவில் வரும் விளையாட்டு வீரர்கள், மாற்றுத்திறனாளிகள் உள்ளிட்டவர்களுக்கான கலந்தாய்வு 29-ந்தேதி முதல் 31-ந்தேதி வரை நடைபெற உள்ளது. அதைத் தொடர்ந்து ஜூன் 1-ந்தேதி முதல் 10-ந்தேதி வரை முதல் கட்ட கலந்தாய்வும், ஜூன் 12-ந்தேதி முதல் 20-ந்தேதி வரை 2-ம் கட்ட கலந்தாய்வும் நடைபெற உள்ளது குறிப்பிடத்தக்கது.