காரில் கடத்த முயன்ற ரூ.2.68 லட்சம் குட்கா பறிமுதல்

மத்திகிரி:

பெங்களூருவில் இருந்து காரில் கடத்த முயன்ற ரூ.2 லட்சத்து 68 ஆயிரம் மதிப்பிலான குட்காவை மத்திகிரியில் போலீசார் பறிமுதல் செய்தனர்.

குட்கா கடத்தல்

ஓசூர் தாலுகா மத்திகிரி போலீஸ் இன்ஸ்பெக்டர் சாவித்திரி, சப்-இன்ஸ்பெக்டர் சிற்றரசு மற்றும் போலீசார் தேன்கனிக்கோட்டை சாலையில் கால்நடை பண்ணை அருகில் வாகன சோதனையில் ஈடுபட்டனர். அப்போது அந்த வழியாக காரை போலீசார் நிறுத்தினர். இதனால் டிரைவர் காரை நிறுத்தி விட்டு அங்கிருந்து தப்பி ஓடி விட்டார்.

இதனால் சந்தேகம் அடைந்த போலீசார் காரில் சோதனை செய்தனர். அதில், தடை செய்யப்பட்ட புகையிலை பொருட்களான ஹான்ஸ், பான்பராக், பான்மசாலா, குட்கா என மொத்தம் 396 கிலோ புகையிலை பொருட்கள் இருந்தன. அவற்றின் மதிப்பு ரூ.2 லட்சத்து 68 ஆயிரம் ஆகும். தொடர்ந்து குட்கா மற்றும் கர்நாடக மாநில பதிவு எண் கொண்ட கார் ஆகியவற்றை போலீசார் பறிமுதல் செய்தனர்.

போலீசார் விசாரணை

தொடர்ந்து போலீசார் நடத்திய விசாரணையில் பெங்களூருவில் இருந்து குட்கா கடத்தி வரப்பட்டது தெரிய வந்தது. இது தொடர்பாக போலீசார் வழக்குப்பதிவு செய்து தப்பி ஓடிய கார் டிரைவர் குறித்து தீவிர விசாரணை நடத்தி வருகிறார்கள்.

இதுகுறித்து போலீசார் கூறுகையில், இந்த ஆண்டு மட்டும் மத்திகிரி போலீஸ் நிலையத்திற்குட்பட்ட பகுதியில் 18 டன் குட்கா பிடிபட்டுள்ளது என்று தெரிவித்தனர்.