பண்ணையாளர்கள் கோழித்தீவனத்தில் நுண்ணுயிர் கிருமிகள் தாக்கம் உள்ளதா? என பரிசோதிக்க வேண்டும் ஆராய்ச்சி நிலையம் தகவல்

நாமக்கல் மாவட்டத்தில் பண்ணையாளர்கள் கோழித்தீவனத்தில் நுண்ணுயிர் கிருமிகளின் தாக்கம் உள்ளதா? என பரிசோதனை செய்ய வேண்டும் என ஆராய்ச்சி நிலையம் அறிவுறுத்தி உள்ளது.

வானிலை

நாமக்கல் மாவட்டத்தில் இன்று (சனிக்கிழமை) முதல் 5 நாட்களுக்கு நிலவும் வானிலை குறித்து கால்நடை மருத்துவக்கல்லூரி மற்றும் ஆராய்ச்சி நிலையம் சார்பில் வெளியிடப்பட்டு உள்ள செய்திக்குறிப்பில் கூறியிருப்பதாவது:-

இன்று (சனிக்கிழமை), 8-ந் தேதி 8 மி.மீட்டரும், நாளை (ஞாயிற்றுக்கிழமை) 10 மி.மீட்டரும், நாளை மறுநாள் (திங்கட்கிழமை) 12 மி.மீட்டரும் மழை பெய்ய வாய்ப்பு உள்ளது. 9-ந் தேதி மழை பெய்ய வாய்ப்பு இல்லை. இன்று முதல் 5 நாட்களுக்கு மணிக்கு 6 கி.மீட்டர் வேகத்தில் காற்று வீசும். இன்று முதல் 3 நாட்களுக்கு வடக்கு திசையில் இருந்தும், 8 மற்றும் 9-ந் தேதிகளில் வடமேற்கு திசையில் இருந்தும் காற்று வீசும்.

அதேபோல் வெப்பநிலையை பொறுத்தவரையில் அதிகபட்சமாக 89.6 டிகிரியாகவும், குறைந்தபட்சமாக 66.2 டிகிரியாகவும் இருக்கும். இதனிடையே காற்றின் ஈரப்பதம் அதிகபட்சமாக முறையே 80, 80, 80, 85, 85 சதவீதமாகவும், குறைந்தபட்சமாக முறையே 65, 65, 60, 55, 55 சதவீதமாகவும் இருக்கும்.

பரவலாக மழை

சிறப்பு வானிலையை பொறுத்தவரை அடுத்த 5 நாட்களுக்கு வானம் லேசான மேகமூட்டத்துடன் காணப்படும். மேலும் மாவட்டத்தில் பரவலாக லேசான மழை பெய்ய வாய்ப்புள்ளது. இதனிடையே கடந்த வாரம் இறந்த கோழிகள் பெரும்பாலும் இறக்கை அழுகல் நோயின் தாக்கத்தால் இறந்தது கோழியினை நோய் கண்காணிப்பு மற்றும் கட்டுப்பாட்டு ஆய்வகத்தில் நடத்தப்பட்ட ஆய்வில் தெரியவந்துள்ளது. எனவே பண்ணையாளர்கள் கோழிகளுக்கு அளிக்கப்படும் தீவனத்தில் நுண்ணுயிர் கிருமிகளின் தாக்கம் உள்ளதா? என பரிசோதித்து அதற்கேற்ப தீவன மேலாண்மை முறைகளை கையாள வேண்டும்‌.

இவ்வாறு அதில் கூறப்பட்டுள்ளது.