கடலூரில் பெண் போலீசின் மகள் கடத்தல் போலீஸ்காரர் உள்பட 4 பேர் மீது வழக்கு

கடலூர் அனைத்து மகளிர் காவல் நிலையத்தில் பணிபுரிபவர் 42 வயதுடைய பெண் போலீஸ். இவர் தனது குடும்பத்தினருடன் புதுநகர் போலீஸ் நிலையத்தின் பின்புறம் உள்ள காவலர் குடியிருப்பில் வசித்து வருகிறார். இவரது மகளான 19 வயதுடைய மாணவி, கடலூரில் உள்ள தனியார் கல்லூரியில் பி.காம். 2-ம் ஆண்டு படித்து வருகிறார். இந்த நிலையில் நேற்று மாலை, வீட்டில் இருந்த மாணவியை திடீரென காணவில்லை. இதனால் அதிர்ச்சி அடைந்த பெற்றோர், பல்வேறு இடங்களில் தேடி பார்த்தனர். இருப்பினும் மாணவி கிடைக்கவில்லை. இதுபற்றி அக்கம் பக்கத்தில் விசாரித்ததில் மாணவியை, அண்ணாமலை நகர் போலீஸ் நிலையத்தில் போலீஸ்காரராக பணிபுரியும் கடலூர் வில்வநகரை சேர்ந்த வேல்முருகன் (வயது 32) என்பவர் கடத்தி சென்றது தெரியவந்தது.

4 பேர் மீது வழக்கு

இதுகுறித்து பெண் போலீஸ், கடலூர் புதுநகர் போலீஸ் நிலையத்தில் புகார் கொடுத்தார். அந்த புகாரில், தனது மகளை வேல்முருகன் கடத்தி சென்று விட்டதாகவும், அவருக்கு உடந்தையாக பெண் போலீசான அவரது தங்கை மகாலட்சுமி(30), அக்காள் காஞ்சனா(33), இவரது கணவர் அருள்(36) ஆகியோர் இருந்ததாகவும் குறிப்பிட்டுள்ளார். அதன் அடிப்படையில் வேல்முருகன் உள்ளிட்ட 4 பேர் மீது போலீசார் வழக்குப்பதிவு செய்து விசாரணை நடத்தி வருகின்றனர். பெண் போலீசின் மகளை, போலீஸ்காரர் கடத்தி சென்ற சம்பவம் கடலூரில் பரபரப்பை ஏற்படுத்தி உள்ளது.