6 பேர் விடுதலையும் மக்கள் மனநிலையும் சட்ட வல்லுனர்கள்-பாதிக்கப்பட்டவர்கள் கருத்து


6 பேர் விடுதலையும் மக்கள் மனநிலையும்  சட்ட வல்லுனர்கள்-பாதிக்கப்பட்டவர்கள் கருத்து
x
தினத்தந்தி 11 Nov 2022 9:30 PM GMT (Updated: 11 Nov 2022 9:31 PM GMT)

6 பேர் விடுதலை குறித்து மக்கள் மனநிலை மற்றும் சட்ட வல்லுனர்கள்-பாதிக்கப்பட்டவர்கள் கருத்து தொிவித்துள்ளனா்.

கள்ளக்குறிச்சி

1991-ம் ஆண்டு மே மாதம் 21-ந் தேதி முன்னாள் பிரதமர் ராஜீவ்காந்தி கொலை செய்யப்பட்டார். தமிழகத்திற்கு தேர்தல் பிரசாரம் செய்யவந்த இடத்தில், ஸ்ரீபெரும்புதூரில் வைத்து மனிதவெடிகுண்டு தாக்குதலில் அந்தத் துயரச் சம்பவம் அரங்கேற்றப்பட்டது.

உலகை உலுக்கிய அந்தக் கொலையில் மனித வெடிகுண்டாக செயல்பட்ட தாணு என்ற பெண் உடல் சிதறிப் பலியானார். முக்கிய குற்றவாளியான ஒற்றைக்கண் சிவராசன் சைனைடு தின்று தற்கொலை செய்துகொண்டார்.

தூக்குத்தண்டனை

*இந்த வழக்கில் 41 பேர் மீது குற்றம் சாட்டப்பட்டது. விடுதலைப்புலி தலைவர் பிரபாகரன், பொட்டு அம்மன், அகிலா ஆகிய 3 பேர் தலைமறைவு குற்றவாளிகளாக அறிவிக்கப்பட்டனர். 12 பேர் தற்கொலை செய்துகொண்டனர். மீதமுள்ள 26 பேர் கைது செய்யப்பட்டு சிறையில் அடைக்கப்பட்டனர்.

*1998-ம் ஆண்டு ஜனவரி மாதம் 28-ந் தேதி பூந்தமல்லி சிறப்பு நீதிமன்றம் 26 பேருக்கும் தூக்குத்தண்டனை விதித்தது. அனைவரும் மேல் முறையீடு செய்தனர்.

*1999-ம் ஆண்டு மே மாதம் 5-ந் தேதி அதில் தீர்ப்பு வழங்கப்பட்டது. 26 பேர்களில் நளினி, சாந்தன், முருகன், பேரறிவாளன் ஆகிய 4 பேருக்கு தூக்குத்தண்டனை உறுதிசெய்யப்பட்டது. ராபர்ட்பயாஸ், ஜெயகுமார், ரவிச்சந்திரன் ஆகிய 3 பேருக்கு தூக்குத்தண்டனை ஆயுள்தண்டனையாகக் குறைக்கப்பட்டது. சண்முகவேலு என்பவர் விடுவிக்கப்பட்டார். அதுபோல் மீதம் உள்ள 18 பேரும் சிறையில் இருந்த காலத்தை தண்டனை காலமாகக் கருதி விடுவிக்கப்பட்டனர்.

எஞ்சிய 7 பேர்

தூக்குத்தண்டனை பெற்ற நளினி, சாந்தன், முருகன், பேரறிவாளன், ஆயுள்தண்டனை பெற்ற ராபர்ட்பயாஸ், ஜெயகுமார், ரவிச்சந்திரன் ஆகிய 7 பேரும் விடுதலை பெறுவதற்காக சட்டப் போராட்டங்களில் ஈடுபட்டு வந்தனர்.

*2000 ஆண்டு ஏப்ரல் மாதம் 24-ந் தேதி நளினியின் தூக்குத்தண்டனையை ஆயுள் தண்டனையாகக் குறைக்கப்பட்டது.

பேரறிவாளன், சாந்தன், முருகன் ஆகிய 3 பேரும் ஜனாதிபதியிடம் கருணை மனு செய்து இருந்தார்கள். அந்த மனுக்கள் கிடப்பில் போடப்பட்டன.

கருணை மனுக்கள் காரணம் இல்லாமல் நிலுவையில் இருந்ததால் 2014-ம் ஆண்டு பிப்ரவரி 19-ந் தேதி அவர்களின் மரணதண்டனையை நீதிமன்றம் ரத்துசெய்தது.

2022-ம் ஆண்டு மே மாதம் 18-ந்தேதி பேரறிவாளன் விடுதலை செய்யப்பட்டார்.

30 ஆண்டுகள் சிறை, சிறையில் நன்னடத்தை, கருணை மனு மீது முடிவு எடுக்காமல் காலம் தாழ்த்தி வருவது போன்றவற்றை காரணம் காட்டி, அரசியல் சாசனம் நீதிமன்றத்துக்கு வழங்கிய சிறப்பு அதிகாரம் 142-வது பிரிவைப் பயன்படுத்தி அவரை விடுதலை செய்தது.

விடுதலை

பேரறிவாளன் விடுதலையை அடிப்படையாக வைத்து, நளினி, முருகன், சாந்தன், ரவிச்சந்திரன், ஜெயகுமார், ராபர்ட்பயாஸ் ஆகிய 6 பேரும் தங்களை விடுதலை செய்யுமாறு சுப்ரீம்கோர்ட்டில் முறையிட்டு இருந்தனர்.

அவர்களின் முறையீட்டை ஏற்றுக்கொண்ட சுப்ரீம் கோர்ட்டு, 6 பேரையும் நேற்று அதிரடியாக விடுதலை செய்தது.

அவர்களின் விடுதலை குறித்து பொதுமக்களும், சட்ட வல்லுனர்களும் பாதிக்கப்பட்டவர்களும் கருத்துத் தெரிவித்து இருக்கிறார்கள்.

வரையறை கொண்டுவரப்பட வேண்டும்

ஐகோர்ட்டு வக்கீல் திருமுருகன்:-

தமிழக அமைச்சரவை தீர்மானத்தின் மீது கவர்னர் விரைந்து முடிவெடுத்திருந்தால் நளினி உள்ளிட்டோர் விடுதலையில் இவ்வளவு காலதாமதம் ஏற்பட்டிருக்காது. 1981-ம் ஆண்டு மாருராம் வழக்கில் சுப்ரீம் கோர்ட்டு நீதிபதி கிருஷ்ணய்யர், கவர்னர் விரும்புகிறாரோ இல்லையோ மாநில அமைச்சரவையின் தீர்மானத்தை ஏற்று நடக்க கடமைப்பட்டவர் என்றும், அமைச்சரவை தீர்மானத்தின் மீது கவர்னரிடம் கையெழுத்து பெறுவது என்பது ஒரு சம்பிரதாய நடவடிக்கை மட்டுமே என்றும் தீர்ப்பு கூறி உள்ளார். இந்த தீர்ப்புகளை எல்லாம் சுட்டிக்காட்டிய போதும் அமைச்சரவை தீர்மானத்தின் மீது கவர்னர் முடிவெடுக்க தாமதப்படுத்தி வந்ததன் விளைவு நளினி, ரவிச்சந்திரன் உள்ளிட்டோர் அமைச்சரவை தீர்மானத்துக்கு பின்பும் பல ஆண்டுகள் சிறையில் இருக்க வேண்டிய நிலைக்கு தள்ளப்பட்டனர். இதுபோன்ற செயல் மாநிலங்களின் உள்ளார்ந்த அதிகாரத்தில் பாதிப்பை ஏற்படுத்தும் வகையில் உள்ளது. இதுபோன்ற சட்ட சிக்கல்கள் பல்வேறு மாநிலங்களில் உள்ளது. எனவே, அமைச்சரவை தீர்மானம் உள்ளிட்ட பல்வேறு விவகாரங்களில் குறிப்பிட்ட நாட்களுக்குள் கவர்னர் உரிய முடிவெடுக்க வேண்டும் என்ற சட்ட வரையறை கொண்டுவரப்பட வேண்டும்.

வக்கீல் ஸ்ரீலேகா:- இந்த வழக்கை பொறுத்தமட்டில் நளினி, பேரறிவாளன் உள்ளிட்ட 7 பேரும் குற்றவாளிகள்தான். இது நீதிமன்ற தீர்ப்பு. இதில், எந்தவித மாற்றுக்கருத்துக்கும் இடமில்லை. சட்டம் என்பது எல்லோருக்கும் பொதுவானதுதான். கருணை வழங்குவதாக இருந்தாலும் அதை குறிப்பிட்ட காலத்துக்குள் வழங்குவதுதான் சரியாக இருக்கும். ராஜீவ்காந்தி கொலையாளிகளை பொறுத்தமட்டில் நீண்டகாலமாக அவர்கள் சிறையில் இருப்பதையும், நன்னடத்தையையும் கருத்தில் கொண்டு சுப்ரீம் கோர்ட்டு தனது வானளாவிய அதிகாரத்தை பயன்படுத்தி அவர்களை விடுவித்துள்ளது. பொதுவாகவே தண்டனை விதிக்கப்பட்டவர்களை மன்னித்து விடுவிப்பது மாநில அரசை பொறுத்தமட்டில் கவர்னருக்குதான் அதிகாரம் உள்ளது. நளினி உள்ளிட்டோரை விடுவிக்க தமிழக அரசு எந்தவித ஆட்சேபனையும் தெரிவிக்காத நிலையில் கவர்னர் முடிவெடுப்பதில் காலதாமதம் ஏற்பட்டது. இதுபோன்ற சிக்கல்களுக்கு உரிய தீர்வு காணப்பட வேண்டும். இல்லாதபட்சத்தில் பொதுமக்கள் விவகாரத்திலும் இது பாதிப்பை ஏற்படுத்தும்.

ராஜகுருவின் மனைவி

குண்டுவெடிப்பில் பலியான இன்ஸ்பெக்டர் ராஜகுருவின் மனைவி பாலசரஸ்வதி:-

எல்லோரும் ராஜீவ்காந்தி கொலையாளிகள் விடுதலையை கொண்டாடுகிறார்கள் அந்த நாளில் இளம் வயது போலீஸ் அதிகாரியாக இருந்த என் கணவர், என்னையும், எனது மகன், மகளையும் சிறுவயதிலேயே தவிக்கவிட்டு காலமாகி விட்டார். என்னை போன்று இன்னும் பலர் குடும்பங்களை இழந்து தவிக்கிறார்கள். பலர் காயம் அடைந்துள்ளனர். காவல்துறையில் மிகச்சிறப்பாக பணியாற்றி எல்லோரது பாராட்டையும் பெற்ற என் கணவர், உயிரோடு இருந்திருந்தால் உயர் பதவியை அலங்கரித்திருப்பார். அவரது மரணம் காவல்துறைக்கு இழப்பு. என்னுடைய குடும்பத்துக்கும் பேரிழப்பு. பாதிக்கப்பட்ட எங்களை பற்றி யார் கவலைப்படுகிறார்கள்?.

இந்த கொலைக்கு காரணமாக இருந்தவர்களை வரவேற்று அறிக்கை தருகிறவர்கள், ராஜீவ்காந்தியோடு சேர்ந்து இறந்து போன 16 பேரில் ஒருவருக்காவது ஒரு சொட்டு கண்ணீர் விட்டது உண்டா?. பாதிக்கப்பட்ட என்னை போன்ற குடும்பத்தினருக்கு இந்த சமுதாயம் என்ன பதில் சொல்லப்போகிறது?.

டி.எஸ்.பி. அனுசுயா

குண்டுவெடிப்பில் காயமடைந்த ஓய்வுபெற்ற டி.எஸ்.பி. அனுசுயா:-

இப்போதும் எனது உடலில் பல இடங்களில் குண்டு புகுந்த காயம் இருக்கிறது. இந்த வேதனையில் இருந்து பாதிக்கப்பட்டவர்கள் தற்போது வரை மீளவில்லை. பலரது வாழ்க்கை சீரழிந்து போனது. நாங்கள் தினம் தினம் வேதனையால் துடித்து கொண்டிருக்கும் போது கொலையாளிகள் விடுதலையை பலர் கொண்டாடுகிறார்கள். எங்கள் வலியையும் வேதனையையும் யாரும் மதிப்பதில்லை.

சமூக ஆர்வலர் அய்யா:- யார் தவறு செய்தாலும் அவர்களுக்கென அளிக்கப்பட்ட தண்டனையை அனுபவிக்க வேண்டும் என்பதில் மாற்றுக்கருத்து இல்லை. அந்த அடிப்படையில் ராஜீவ்காந்தி கொலை வழக்கு குற்றவாளிகள் தங்களுக்கு விதிக்கப்பட்ட தண்டனை காலத்தை அனுபவித்து விட்ட நிலையில் நீண்டகாலமாக சிறையில் இருந்து வருகின்றனர். மன்னிப்பு என்பது தமிழர்களின் பண்பாடு. அந்த அடிப்படையில் தான் நளினி உள்ளிட்டோர் குறிப்பிட்ட காலம் சிறை தண்டனையை அனுபவித்து விட்ட நிலையில் தொடர்ந்து அவர்கள் சிரமங்களை சந்தித்து வருவதை கருத்தில் கொண்டு அவர்கள் மன்னிக்கப்பட வேண்டும் என்பது பெரும்பாலான தமிழர்களின் கருத்தாக இருந்து வந்தது. அது, தற்போது சுப்ரீம் கோர்ட்டு தீர்ப்பு மூலம் நிறைவேறி உள்ளது.

மனிதநேய கண்ணோட்டத்துடன்...

விழுப்புரத்தை சேர்ந்த மனித உரிமை ஆர்வலர் தமிழ்வேங்கை:-

முன்னாள் பிரதமர் ராஜீவ்காந்தி கொலை வழக்கில் சரியான கோணத்தில் புலனாய்வு செய்யப்படவில்லை என்பது பல சட்ட அறிஞர்களின் கருத்தாகும். பொய்யான குற்றச்சாட்டின்பேரில் தங்களின் 30 வருட இளமைக்காலத்தை சிறையில் கழித்திருக்கும் 7 பேருக்கும் தமிழக அரசு கருணை அடிப்படையில் உதவ முன்வர வேண்டும். திருந்தி வாழ வைப்பதற்குத்தான் சிறைச்சாலையே தவிர ஓர் உயிரை பறிப்பதற்கல்ல என்ற மனிதநேய கண்ணோட்டத்துடன் தீர்ப்பு வழங்கிய உச்சநீதிமன்ற நீதிபதிகளை மனதார பாராட்டுகிறேன்.

வரவேற்கத்தக்கது

திண்டிவனத்தை சேர்ந்த சமூக ஆர்வலர் பிரபா கல்வி மணி:-

உலக நாடுகள் தூக்கு தண்டனையை எதிர்த்து குரல் கொடுத்து வந்த நிலையில் ராஜீவ் காந்தி கொலை வழக்கில் சம்பந்தப்பட்டவர்களுக்கு தூக்கு தண்டனை விதிக்கப்பட்டது. இவர்களை விடுதலை செய்வதற்கு மத்திய, மாநில அரசுகள் மற்றும் மாநில கவர்னருக்கு அதிகாரம் இருந்த போதிலும் இவர்கள் யாரும் அவர்களை விடுதலை செய்ய முன்வரவில்லை. தமிழக அரசு சட்டசபையில் தீர்மானம் இயற்றிய பிறகும் காலம் தாழ்த்தியது தவறானது. தற்போது அவர்களை கருணை அடிப்படையில் சுப்ரீம் கோர்ட்டு விடுதலை செய்து இருப்பது வரவேற்கத்தக்கது. இதில் பாதிக்கப்பட்ட அனைவருக்கும் அரசு நஷ்ட ஈடு வழங்க வேண்டும்.

கள்ளக்குறிச்சி தென்கீரனூர் கிராமத்தைச் சேர்ந்த ராஜா:-

ராஜீவ்காந்தி கொலை வழக்கில் நளினி, சாந்தன், முருகன் உள்பட 7 பேர் 30 வருடங்களுக்கு மேலாக சிறை தண்டனை அனுபவித்து வந்தனர். தற்போது அவர்கள் விடுதலை செய்து இருப்பது வரவேற்க தக்க ஒன்று தான்.

இவ்வாறு அவர்கள் கூறினர்.


Next Story