சாலை பராமரிப்பு ஊழியர்கள் ரத்தத்தில் கையெழுத்திட்டு போராட்டம்

ரத்த கையெழுத்து போராட்டம்

கரூர் உதவி கோட்ட பொறியாளர் அலுவலகம், பயணியர் விடுதி வளாகத்தில் தமிழ்நாடு நெடுஞ்சாலைத்துறை சாலை பராமரிப்பு ஊழியர்கள் சங்கம் சார்பில் நேற்று பல்வேறு கோரிக்கைகளை வலியுறுத்தி ரத்தத்தில் கையெழுத்திட்டு போராட்டம் நடைபெற்றது. இதற்கு மாவட்ட தலைவர் ஞானசேகரன் தலைமை தாங்கினார். மாநில செயலாளர் குப்புசாமி, தமிழ்நாடு அரசு ஊழியர்கள் சங்க முன்னாள் மாநில துணை தலைவர் மகாவிஷ்ணன் ஆகியோர் கண்டன உரையாற்றினர்.

இதில் மாவட்ட செயலாளர் சிங்கராயர், மாவட்ட பொருளாளர் வெங்கடேசுவரன் உள்பட பலர் கலந்து கொண்டு ரத்தத்தால் கையெழுத்திட்டு கோரிக்கைகளை நிறைவேற்றக்கோரி கோஷங்களை எழுப்பினர்.

சாலைப்பணியாளர்கள்

அப்போது சாலைப்பணியாளர்களின் 41 மாத காலத்தை எந்த விதமான பலன்களுக்கும் பொருந்தாத வகையில் வெளியிடப்பட்ட அரசாணையை ரத்து செய்து 41 மாத பணி நீக்க காலத்தை பணி ஓய்வுக்கு பின்பு ஓய்வூதிய பலன்களுக்கும், பணிகொடைக்கும் பொருந்தகூடிய வகையில் அரசாணை வெளியிட வேண்டும். சாலை ஆய்வாளர்கள் பணியிடத்தை திறன்மிகு உதவியாளர் என பெயர் மாற்றம் செய்ததை போல் சாலைப்பணியாளர் பணியிடத்தை திறன்மிகு இல்லா பணியாளர் என பெயர் மாற்றம் செய்திட வேண்டும். சாலைப்பணியாளர்களின் பணி முழுவதும் ஆபத்து நிறைந்த பணிகளாக உள்ளது. தமிழக அரசும், நெடுஞ்சாலைத்துறை நிர்வாகமும் அதனை கருத்தில் கொண்டு சாலைப்பணியாளர்களுக்கு ஊதியத்தில் 10 சதவீத ஆபத்துப்படி வழங்கிட வேண்டும். தமிழகம் முழுவதும் நெடுஞ்சாலை கட்டுமானம் மற்றும் பராமரிப்பு கோட்டங்களில் காலியாக உள்ள 8 ஆயிரம் சாலைப்பணியாளர் பணியிடத்தை தமிழக அரசு நிரப்பிட வேண்டும்.

ரத்த கையெழுத்து

சாலைகளை பராமரிக்க 5 கிலோ மீட்டருக்கு 2 சாலைப்பணியாளர்கள் என பணியமர்த்த ஒப்புதல் வழங்கிட வேண்டும். தமிழக நெடுஞ்சாலைத்துறையில் உள்ள மாநில சாலைகள், மாவட்ட முக்கிய சாலைகள், மாவட்ட இதர சாலைகள் முறையிலும் திட்டத்தின் மூலம் தனியார் பராமரிப்புக்கு வழங்கப்படுவதை கைவிட வேண்டும் என்பன உள்பட பல்வேறு கோரிக்கைகளை வலியுறுத்தி இந்த போராட்டம் நடந்ததாக சங்க நிர்வாகிகள் தெரிவித்தனர்.