உலகக் கோப்பை கிரிக்கெட்: இலங்கையை வீழ்த்தி தென்ஆப்பிரிக்கா அபார வெற்றி

புதுடெல்லி,

உலகக் கோப்பை கிரிக்கெட் தொடரில் டெல்லியில் இன்று நடைபெற்ற 4-வது லீக் ஆட்டத்தில் தென்ஆப்பிரிக்கா-இலங்கை அணிகள் மோதின. இந்த போட்டியில் டாஸ் வென்ற இலங்கை அணி முதலில் பந்து வீச்சை தேர்வு செய்தது. இதையடுத்து தென்ஆப்பிரிக்க அணி முதலில் பேட்டிங் செய்தது.

தொடக்கம் முதலே அதிரடி காட்டிய தென்ஆப்பிரிக்க அணி ரன்மழை பொழிந்தது. குயிண்டன் டி காக் (100 ரன்கள்), வாண்டர் உசேன் (108 ரன்கள்) ஏய்டென் மார்கரம் (106 ரன்கள்) ஆகியோர் சதம் அடித்தனர். நிர்ணயிக்கப்பட்ட 50 ஓவர்கள் முடிவில் அந்த அணி 5 விக்கெட்டுகள் இழப்புக்கு 428 ரன்கள் குவித்தது.

இதையடுத்து 429 ரன்கள் எடுத்தால் வெற்றி என்ற கடின இலக்குடன் இலங்கை அணி களமிறங்கியது. அந்த அணியில் அதிகபட்சமாக குசல் மெண்டிஸ் 76 ரன்கள், சரித் அசலங்கா 79 ரன்கள், தசுன் ஷனகா 68 ரன்கள் எடுத்தனர். இந்த நிலையில் 44.5 ஓவர்கள் முடிவில் 326 ரன்கள் எடுத்திருந்த நிலையில் இலங்கை அணி அனைத்து விக்கெட்டுகளையும் இழந்தது.

இதையடுத்து இந்த போட்டியில் தென்ஆப்பிரிக்கா 102 ரன்கள் வித்தியாசத்தில் இலங்கையை வீழ்த்தி அபார வெற்றி பெற்றது.