ஐ.பி.எல். கிரிக்கெட்: கொல்கத்தா-பெங்களூரு அணிகள் இன்று மோதல்

கொல்கத்தா,

16-வது ஐ.பி.எல். கிரிக்கெட் தொடரில் கொல்கத்தா ஈடன் கார்டன் மைதானத்தில் இன்று (வியாழக்கிழமை) இரவு நடைபெறும் 9-வது லீக் ஆட்டத்தில் கொல்கத்தா நைட் ரைடர்ஸ்-பெங்களூரு ராயல் சேலஞ்சர்ஸ் அணிகள் மோதுகின்றன.

நிதிஷ் ராணா தலைமையிலான கொல்கத்தா நைட் ரைடர்ஸ் அணி மழை பாதிப்புக்குள்ளான தனது முதலாவது லீக் ஆட்டத்தில் 7 ரன் வித்தியாசத்தில் பஞ்சாப் கிங்சிடம் வீழ்ந்தது. முந்தைய சீசனில் அந்த அணியின் கேப்டனாக இருந்த ஸ்ரேயாஸ் அய்யர் முதுகின் அடிப்பகுதியில் ஏற்பட்ட காயத்துக்கு வெளிநாட்டில் ஆபரேஷன் செய்ய இருப்பதால், இந்த ஐ.பி.எல். தொடரில் இருந்து விலகி விட்டார்.

மேலும் வங்காளதேச அணியின் ஆல்-ரவுண்டர் ஷகிப் அல்-ஹசனும் ஒதுங்கி உள்ளார். அயர்லாந்து அணிக்கு எதிரான டெஸ்ட் போட்டியில் ஆடுவதால் வங்காளதேச வீரர் லிட்டான் தாஸ் இன்னும் அணியினருடன் இணையவில்லை. இவையெல்லாம் கொல்கத்தா அணிக்கு பின்னடைவாகும்.

அதே நேரம் பாப் டு பிளிஸ்சிஸ் தலைமையிலான பெங்களூரு ராயல் சேலஞ்சர்ஸ் அணி தனது முதலாவது லீக் ஆட்டத்தில் 8 விக்கெட் வித்தியாசத்தில் 5 முறை சாம்பியனான மும்பை இந்தியன்சை வீழ்த்தியது. காயம் பிரச்சினையால் தவிக்கும் கொல்கத்தா, பெங்களூரு அணியின் சவாலை சமாளிக்குமா என்பதை பொறுத்திருந்து தான் பார்க்க வேண்டும்.

இவ்விரு அணிகளும் இதுவரை 30 ஆட்டங்களில் நேருக்கு நேர் மோதி இருக்கின்றன. இதில் 16-ல் கொல்கத்தாவும், 14-ல் பெங்களூருவும் வெற்றி பெற்று இருக்கின்றன.