ரஞ்சி கோப்பை கிரிக்கெட்: தமிழ்நாடு-ஐதராபாத் ஆட்டம் 'டிரா'

ஐதராபாத்,

38 அணிகள் பங்கேற்றுள்ள ரஞ்சி கோப்பை கிரிக்கெட் போட்டி இந்தியாவில் பல்வேறு நகரங்களில் நடந்து வருகிறது. இதில் ஐதராபாத்தில் நடந்த 'பி' பிரிவு ஆட்டம் ஒன்றில் தமிழ்நாடு-ஐதராபாத் அணிகள் மோதின. இதில் முதல் இன்னிங்சில் ஐதராபாத் அணி 395 ரன்னில் ஆல்-அவுட் ஆனது. தமிழக அணி 4 விக்கெட்டுக்கு 510 ரன்கள் குவித்து டிக்ளேர் செய்தது.

பின்னர் 115 ரன்கள் முன்னிலையுடன் 2-வது இன்னிங்சை ஆடிய ஐதராபாத் அணி 3-வது நாள் முடிவில் விக்கெட் இழப்பின்றி 28 ரன்கள் எடுத்து இருந்தது. நேற்று 4-வது மற்றும் கடைசி நாள் ஆட்டம் நடந்தது. தொடர்ந்து ஆடிய ஐதராபாத் அணி 85 ஓவர்களில் 258 ரன்கள் எடுத்து ஆல்-அவுட் ஆனது. இதைத்தொடர்ந்து 144 ரன்கள் எடுத்தால் வெற்றி என்ற இலக்குடன் தமிழக அணி அதிரடியாக விளையாடியது. ஓவர்கள் குறைவாக இருந்ததால் இலக்கை எட்ட முடியவில்லை.

தமிழக அணி 7 ஓவர்களில் ஒரு விக்கெட் இழப்புக்கு 108 ரன்கள் எடுத்த நிலையில் ஆட்டம் டிராவில் முடிந்தது. சாய் சுதர்சன் 42 ரன்னில் (20 பந்து, 5 சிக்சர்) ஆட்டம் இழந்தார். என்.ஜெகதீசன் 59 ரன்னுடனும் (22 பந்து, 8 சிக்சர்), கேப்டன் பாபா இந்திரஜித் ஒரு ரன்னுடனும் களத்தில் இருந்தனர். முதல் இன்னிங்ஸ் முன்னிலை அடிப்படையில் தமிழக அணி 3 புள்ளி பெற்றது. ஐதராபாத்துக்கு ஒரு புள்ளி கிடைத்தது.

சோவிமாவில் நடந்த ஒரு ஆட்டத்தில் (ஏ பிரிவு) 2-வது இன்னிங்சில் நாகலாந்தை வெறும் 25 ரன்னில் சுருட்டிய உத்தரகாண்ட் அணி 174 ரன்கள் வித்தியாசத்தில் வெற்றி பெற்றது. கோவா-ராஜஸ்தான் அணிகள் இடையிலான ஆட்டம் டிராவில் முடிந்தது. முதல் இன்னிங்சில் முன்னிலை பெற்றதால் கோவா அணி 3 புள்ளியை தனதாக்கியது.