ஆஸ்திரேலியாவுக்கு எதிரான ஆக்கி: இந்திய பெண்கள் அணி மீண்டும் தோல்வி

அடிலெய்டு,

ஆசிய விளையாட்டு போட்டிக்கு தயாராகும் பொருட்டு இந்திய பெண்கள் ஆக்கி அணி, ஆஸ்திரேலியாவில் சுற்றுப்பயணம் செய்து அந்த நாட்டு அணிக்கு எதிராக விளையாடி வருகிறது. இதில் இந்திய அணி முதலாவது ஆட்டத்தில் 2-4 என்ற கோல் கணக்கிலும், 2-வது ஆட்டத்தில் 2-3 என்ற கோல் கணக்கிலும் தோல்வி கண்டு 0-2 என்ற கணக்கில் தொடரை இழந்தது. 3-வது ஆட்டம் 1-1 என்ற கோல் கணக்கில் டிராவில் முடிந்தது.

இதையடுத்து இந்தியா-ஆஸ்திரேலியா 'ஏ' பெண்கள் அணிகள் இடையிலான முதலாவது ஆட்டம் அடிலெய்டில் நேற்று நடந்தது. திரில்லிங்கான இந்த மோதலில் இந்தியா 2-3 என்ற கோல் கணக்கில் ஆஸ்திரேலியா 'ஏ' அணியிடம் பணிந்தது. ஆஸ்திரேலிய 'ஏ' அணியில் அலிஸ் அர்னோட் 18-வது நிமிடத்திலும், ரூபி ஹாரிஸ் 20-வது, 35-வது நிமிடங்களிலும் கோல் அடித்தனர்.

இந்திய அணி தரப்பில் சலிமா டெடி 40-வது நிமிடத்திலும், சங்கீதா குமாரி 54-வது நிமிடத்திலும் பதில் கோல் திருப்பினர். இவ்விரு அணிகள் இடையிலான 2-வது மற்றும் கடைசி ஆட்டம் நாளை நடக்கிறது.