சீன ஓபன் பேட்மிண்டன்: சாய்னா, சிந்து வெற்றி

புஜோவ்,

சீன ஓபன் சூப்பர் சீரிஸ் பேட்மிண்டன் போட்டியின் பிரதான சுற்று புஜோவ் நகரில் நேற்று தொடங்கியது. இதன் பெண்கள் ஒற்றையர் முதல் சுற்று ஆட்டம் ஒன்றில் உலக தரவரிசையில் 11-வது இடத்தில் இருக்கும் இந்திய வீராங்கனை சாய்னா நேவால், அமெரிக்காவின் பெய்வென் ஜாங்கை எதிர்கொண்டார். இதில் அபாரமாக ஆடிய சாய்னா 21-12, 21-13 என்ற நேர்செட்டில் பெய்வென் ஜாங்கை விரட்டியடித்து 2-வது சுற்றுக்குள் நுழைந்தார். சாய்னா அடுத்து அகானே யமாகுச்சியை (ஜப்பான்) சந்திக்கிறார். மற்றொரு முதல் சுற்றில் இந்திய நட்சத்திரம் பி.வி.சிந்து 24-22, 23-21 என்ற நேர் செட்டில் ஜப்பானின் சயாகா சாட்டோவை வீழ்த்தினார்.

ஆண்கள் ஒற்றையர் முதல் சுற்றில் இந்திய வீரர் பிரனாய் 18-21, 21-16, 21-19 என்ற செட் கணக்கில் 1 மணி நேரம் 29 நிமிடங்கள் போராடி தென்கொரியாவின் லீ டோங் கீனை வென்றார்.