மாநில கல்லூரி கைப்பந்து: பனிமலர் அணி ‘சாம்பியன்’

சென்னை,

சிவகங்கை மாவட்ட கைப்பந்து சங்கம் மற்றும் சேது பாஸ்கரா கல்வி குழுமம் சார்பில் தமிழ்நாடு கைப்பந்து சங்கம் அனுமதியுடன் கல்லூரி அணிகளுக்கான 3-வது மாநில கைப்பந்து சாம்பியன்ஷிப் போட்டி சிவகங்கை மாவட்டம் கண்ட்ரமாணிக்கத்தில் உள்ள சேதுபாஸ்கரா ஐ.டி.ஐ. வளாகத்தில் கடந்த 4 நாட்கள் நடந்தது. இதில் ஆண்கள் பிரிவில் 21 அணிகளும், பெண்கள் பிரிவில் 16 அணிகளும் பங்கேற்றன.

நேற்று இரவு நடந்த ஆண்கள் பிரிவு இறுதிப்போட்டியில் பனிமலர் என்ஜினீயரிங் (சென்னை)-ஸ்ரீ சரஸ்வதி தியாகராஜா (பொள்ளாச்சி) கல்லூரி அணிகள் பலப்பரீட்சை நடத்தின. இதில் பனிமலர் அணி 19-25, 25-23, 25-22, 25-16 என்ற செட் கணக்கில் சரஸ்வதி தியாகராஜா கல்லூரியை வீழ்த்தி சாம்பியன் பட்டத்தை தனதாக்கியது.

முன்னதாக நடந்த 3-வது இடத்துக்கான ஆட்டத்தில் செயின்ட் ஜோசப்ஸ் என்ஜினீயரிங் கல்லூரி (சென்னை) அணி, ஜமால் முகமது கல்லூரியை (திருச்சி) எதிர்கொண்டது. விறுவிறுப்பான இந்த ஆட்டத்தில் செயின்ட் ஜோசப்ஸ் அணி 20-25, 25-23, 28-26 என்ற செட் கணக்கில் ஜமால் முகமது அணியை சாய்த்து 3-வது இடத்தை சொந்தமாக்கியது.

பெண்கள் பிரிவில் நடந்த இறுதிப்போட்டியில் பி.கே.ஆர். (கோபிசெட்டி பாளையம்) - இந்துஸ்தான் (சென்னை) கல்லூரி அணிகள் மோதின. 5 செட்கள் வரை பரபரப்பாக அரங்கேறிய இந்த ஆட்டத்தில் பி.கே.ஆர்.அணி 25-15, 23-25, 24-26, 25-21, 15-11 என்ற செட் கணக்கில் இந்துஸ்தான் அணியை போராடி வீழ்த்தி சாம்பியன் பட்டத்தை கைப்பற்றியது.

முன்னதாக நடந்த 3-வது இடத்துக்கான ஆட்டத்தில் எஸ்.ஆர்.எம். (சென்னை) அணி 25-17, 25-11 என்ற நேர்செட்டில் எம்.ஓ.பி. வைஷ்ணவா (சென்னை) அணியை நேர்செட்டில் தோற்கடித்தது.