திமுகவை வீழ்த்தவே அதிமுக-பாஜக கூட்டணி - நடிகை கவுதமி

கோவை,

கோவையில் நடிகை கவுதமி நிருபர்களுக்கு அளித்த பேட்டியில் கூறியதாவது:-

அதிமுக- பாஜக கூட்டணி நல்ல முடிவு தான். இல்லையெனில் இந்த முடிவை அதிமுக பொதுச்செயலாளர் எடப்பாடி பழனிசாமி எடுத்திருக்க மாட்டார். நான், பாஜகவில் இருந்து அதிமுகவுக்கு வந்துள்ளேன். பாஜகவில் இருந்து விலகியதற்கும், அதிமுகவில் இணைந்ததற்கும் நிறைய இடைவெளி உள்ளது.

ஓ.பன்னீர்செல்வம், டி.டி.வி.தினகரன் அதிமுகவுடன் இணைய வாய்ப்பு இல்லை. இந்த கட்சியில் அவர்கள் இருப்பதாலோ, அல்லது விலகிப் போவதாலோ அதிமுகவை எதையும் செய்ய முடியாது. பாஜக தலைவராக நயினார் நாகேந்திரன் தேர்வு செய்யப்பட்ட தற்கு வாழ்த்துகள். திமுகவை வீழ்த்த வேண்டும் என்பதற்காக அதிமுக-பாஜக கூட்டணி அமைக்கப்பட்டு உள்ளது.

அதிமுக-பாஜக கூட்டணி நீண்ட வரலாறு உடையது. பல தேர்தல்களை சந்தித்து வெற்றிகளையும் கண்டுள்ளது. அதிமுகவின் மேம்பாடு, வளர்ச்சிக்காக மட்டுமல்லாமல் மக்களின் நலனுக்காக இந்த ஒரு முடிவை எடுத்து இருப்பார்களே தவிர வேறு எந்த சந்தேகமும் தேவையில்லை.

திமுகஆட்சியில் விலைவாசி அதிகரித்துள்ளது. ஊதியம் உயரவில்லை, வேலைவாய்ப்பு இல்லை, பெண்களுக்கு பாதுகாப்பு இல்லை. யாருடைய உரிமையும் பாதுகாக்கப்பட வில்லை. 4 ஆண்டுகள் முடிந்து விட்டது. இனிவரும் காலங்களில் அவர்களது செயல்பாடுகள் வெறும் மாயையாக மட்டுமே இருக்கும். 2026-ம் ஆண்டு அதிமுக தலைமையிலான தேசிய ஜனநாயக கூட்டணி ஆட்சி அமையும். இவ்வாறு அவர் கூறினார்.