5வது நாள் ஆட்டம்: கிறிஸ் வோக்ஸ் பேட்டிங் செய்வாரா..? - ஜோ ரூட் பதில்

லண்டன்,

இந்தியா - இங்கிலாந்து அணிகள் மோதும் 5-வது மற்றும் கடைசி டெஸ்ட் போட்டி லண்டன் ஓவல் மைதானத்தில் நடைபெற்று வருகிறது. இந்திய அணி முதல் இன்னிங்ஸில் 224 ரன்களில் சுருண்டது. இங்கிலாந்து முதல் இன்னிங்ஸில் 247 ரன்கள் எடுத்தது. இது இந்தியாவின் முதல் இன்னிங்ஸ் ஸ்கோரை விட 23 ரன்கள் கூடுதலாகும்.

23 ரன்கள் பின்தங்கிய நிலையில் இரண்டாவது இன்னிங்ஸை விளையாடிய இந்தியா 396 ரன்களுக்கு ஆட்டமிழந்தது. இதனால் இங்கிலாந்து அணிக்கு 374 ரன்கள் இலக்கு நிர்ணயிக்கப்பட்டது. தொடர்ந்து 374ரன்கள் இலக்குடன் இங்கிலாந்து அணி 2வது இன்னிங்சில் விளையாடியது. தொடக்கம் முதல் பென் டக்கெட் , ஜாக் கிராலி இருவரும் இணைந்து சிறப்பாக விளையாடினர் .

தொடக்க விக்கெட்டுக்கு 50 ரன்கள் சேர்த்த நிலையில் ஜாக் கிராலி 14 ரன்களுக்கு முகமது சிராஜ் பந்துவீச்சில் ஆட்டமிழந்தார். நான்காம் நாள் ஆட்டம் நேற்று நடைபெற்றது. பென் டக்கெட் அரை சதம் கடந்து 54 ரன்னில் அவுட்டானார். ஆலி போப் 27 ரன்னில் வெளியேறினார். தொடர்ந்து ஜோ ரூட் உடன் ஹாரி புரூக் இணைந்தார். இந்த ஜோடி நிதானமாக ஆடியது. இருவரும் சதம் கடந்தனர். 4வது விக்கெட்டுக்கு 195 ரன்கள் சேர்த்த நிலையில் ஹாரி புரூக் 111 ரன்னில் அவுட்டானார். ஜோ ரூட் 105 ரன்னில் வெளியேறினார்.மழை காரணமாக ஆட்டம் சிறிது தடைபட்டது.

இறுதியில், நான்காம் நாள் முடிவில் இங்கிலாந்து 6 விக்கெட்டுக்கு 339 ரன்கள் எடுத்துள்ளது. அந்த அணி வெற்றி பெற இன்னும் 35 ரன்கள் தேவை.இந்தியா வெற்றி பெற 4 விக்கெட்டுகள் மட்டுமே தேவை என்பதால் இன்று நடைபெறும் கடைசி நாள் ஆட்டத்தில் பரபரப்பு ஏற்பட்டுள்ளது. இந்த ஆட்டத்தில் கிறிஸ் வோக்ஸ் காயம் அடைந்தார்.

இதனால் அவர் இந்தியாவின் 2வது இன்னிங்சில் பந்துவீசவில்லை. இதன் காரணமாக அவர் இன்று பேட்டிங் செய்ய வேண்டிய நிலைமை வந்தால் அவர் பேட்டிங் செய்வாரா? என்ற கேள்விக்கு இங்கிலாந்து முன்னணி வீரர் ஜோ ரூட் பதில் அளித்துள்ளார். இது தொடர்பாக அவர் கூறியதாவது,

கிறிஸ் வோக்ஸ் மிகுந்த வேதனையில் உள்ளார். இந்தத் தொடரில் ரிஷப் பந்த் கால் உடைந்து பேட்டிங் செய்வதைப் பார்த்தோம். வோக்ஸ் இங்கிலாந்து அணிக்காக தனது உடலைப் பலப்படுத்தி தயாராக உள்ளார். என்றார். ஜோ ரூட் கூறியதை வைத்து பார்க்கும் போது வோக்ஸ் பேட்டிங் செய்ய வேண்டிய நிலைமை வந்தால் அவர் நிச்சயமாக பேட்டிங் செய்ய களம் இறங்குவார் என தெரிகிறது.