தனுசு - தமிழ் மாத ஜோதிடம்

ஆனி மாத ராசி பலன்கள் 15-06-2022 முதல் 16-07-2022 வரை

முடியாத காரியத்தை எளிதில் செய்து முடிக்கும் ஆற்றல் பெற்ற தனுசு ராசி நேயர்களே!

ஆனி மாதக் கிரக நிலைகளை ஆராய்ந்து பார்க்கும் பொழுது, மாதத் தொடக்கத்தில் உங்கள் ராசிநாதன் குரு பகவானோடு விரயாதிபதி செவ்வாய் இணைந்து சஞ்சரிப்பதால் விரயங்கள் கூடுதலாகவே இருக்கும்.

ரிஷப சுக்ரன் சஞ்சாரம்

ஆனி 4-ந் தேதி, ரிஷப ராசிக்கு சுக்ரன் செல்கிறார். உங்கள் ராசிக்கு 6, 11 ஆகிய இடங்களுக்கு அதிபதியான சுக்ரன் 6-ம் இடத்தில் சஞ்சரிக்கும் பொழுது, உத்தியோகம் மற்றும் தொழிலில் நன்மைகள் ஏற்படும். புதிய ஒப்பந்தங்கள் வந்து சேரும். இதுவரை போராடியும் வராத பாக்கிகள் இப்பொழுது வசூலாகும். உடல்நலத்தில் கூடுதல் கவனம் தேவை. சிறுசிறு தொல்லைகள் அடிக்கடி தலைதூக்கும்.

மிதுன - புதன் சஞ்சாரம்

ஆனி 11-ந் தேதி, மிதுன ராசிக்கு புதன் செல்கிறார். உங்கள் ராசிக்கு 7, 10 ஆகிய இடங்களுக்கு அதிபதியானவர் புதன். அவர் சப்தம ஸ்தானத்தில் சொந்த வீட்டில் பலம்பெற்று சஞ்சரிக்கும் பொழுது, கல்யாணம் போன்ற சுபகாரியங்கள் இல்லத்தில் நடைபெறும். கடமையில் இருந்த தொய்வு அகலும். பயணங்கள் பலன் தருவதாக இருக்கும். குடும்ப முன்னேற்றம் கூடும்.

மேஷ - செவ்வாய் சஞ்சாரம்

ஆனி 12-ந் தேதி, மேஷ ராசிக்கு செவ்வாய் செல்கிறார். மேஷம் செவ்வாய்க்கு சொந்த வீடாகும். தைரியகாரகன் செவ்வாய் பூர்வ புண்ணிய ஸ்தானத்தில் பலம்பெற்றிருக்கும் இந்த நேரம், தைரியமும், தன்னம்பிக்கையும் அதிகரிக்கும். தனவரவு திருப்தி தரும். பூர்வீக சொத்துக்களை கொடுத்துவிட்டுப் புதிய சொத்துக்கள் வாங்குவதில் கவனம் செலுத்துவீர்கள். பொதுவாழ்வில் புதிய பதவிகள் கிடைக்கலாம். உத்தியோகத்தில் உள்ளவர்களுக்கு கூடுதல் பொறுப்பும், அதற்கேற்ப வருமானமும் உண்டு.

கடக - புதன் சஞ்சாரம்

ஆனி 28-ந் தேதி, கடக ராசிக்குப் புதன் செல்கிறார். மறைந்த புதனால் நிறைந்த தனலாபம் உண்டு. கேந்திராதிபத்தியத்தில் தோஷம் பெற்ற கிரகம் மறைவது யோகம்தான். தொழிலில் இருந்த குறுக்கீடுகள் அகலும். தொலை தூரத்தில் இருந்து நல்ல தகவல் வந்து சேரும். தொழிலில் புதிய பங்குதாரர்கள் வந்திணையும் வாய்ப்பு உண்டு. சுபகாரியங்கள் நடைபெறும் நேரம் இது.

மிதுன - சுக்ரன் சஞ்சாரம்

ஆனி 29-ந் தேதி, மிதுன ராசிக்கு சுக்ரன் செல்கிறார். உங்கள் ராசிக்கு லாபாதிபதியான சுக்ரன் 7-ல் வரும்பொழுது பகை கிரகமாக இருந்தாலும் பலன் கொடுக்கும். அதே நேரத்தில் பாக்கியாதிபதி சூரியனோடு அவர் இணைந்திருப்பதால் எதிர்பார்ப்புகள் எளிதில் நிறைவேறும். இல்லத்தில் உள்ளவர்களின் ஒத்துழைப்போடு நல்ல காரியங்கள் பலவும் செய்து முடிப்பீர்கள். அடகு வைத்த நகைகளை மீட்டுக் கொண்டுவரும் வாய்ப்பு கிட்டும். எதிர்கால நலன் கருதி எடுத்த முயற்சிகளில் வெற்றி உண்டு. பெண் வழிப் பிரச்சினைகள் அகலும். உத்தியோகத்தில் பணி நிரந்தரமாகும்.

இம்மாதம் ஞாயிற்றுக்கிழமை தோறும் சிவனை வழிபடுங்கள்.

பணத்தேவையைப் பூர்த்தி செய்யும் நாட்கள்:- ஜூன்: 18, 19, 22, 23, ஜூலை: 2, 3, 4, 8, 9, 15, 16மகிழ்ச்சி தரும் வண்ணம்:- மஞ்சள்.

பெண்களுக்கான பலன்கள்

இம்மாதம் விரயங்கள் கொஞ்சம் அதிகமாக இருக்கும். வீட்டுத் தேவைகள் கடைசி நேரத்தில் பூர்த்தியாகும். கணவன் - மனைவிக்குள் இருந்த கருத்து வேறுபாடு அகலும். குடும்ப ஒற்றுமை திருப்தி தரும். பிள்ளைகளின் சுபகாரியப் பேச்சுக்கள் கைகூடும். பெற்றோர் வழியில் ஏற்பட்ட பிரச்சினைகள் அகலும். பணிபுரியும் பெண்களுக்கு இதுவரை இருந்த நெருக்கடி நிலை மாறும். உங்கள் திறமைக்கு அங்கீகாரம் கிடைக்கும்.