கிறைஸ்ட்சர்ச்,

இங்கிலாந்து கிரிக்கெட் அணி நியூசிலாந்தில் சுற்றுப்பயணம் மேற்கொண்டு மூன்று டி20 மற்றும் மூன்று ஒருநாள் போட்டிகளில் விளையாடுகிறது. இதில் இவ்விரு அணிகளுக்கு இடையே முதலில் டி20 போட்டி நடைபெறுகிறது. அதன்படி கிறைஸ்ட்சர்ச்சில் கடந்த 18-ந்தேதி நடந்த முதலாவது டி20 போட்டி மழையால் பாதியில் கைவிடப்பட்டது.

இதனையடுத்து நியூசிலாந்து-இங்கிலாந்து இடையிலான 2-வது டி20 போட்டி இன்று நடைபெற்றது. இதில் டாஸ் வென்ற நியூசிலாந்து அணி கேப்டன் மிட்செல் சான்ட்னெர் பந்துவீச்சை தேர்வு செய்தார்.

அதன்படி முதலில் பேட்டிங் செய்த இங்கிலாந்து அணி 20 ஓவர்களில் 4 விக்கெட்டு இழப்புக்கு 236 ரன்கள் குவித்தது. அதிகபட்சமாக அதிரடியாக விளையாடிய பில் சால்ட் 85 ரன்களும், ஹாரி புரூக் 78 ரன்களும் அடித்தனர். நியூசிலாந்து தரப்பில் ஜேமிசன் 2 விக்கெட்டுகள் வீழ்த்தினார்.

அதனை தொடர்ந்து 237 ரன்கள் எடுத்தால் வெற்றி என்ற கடின இலக்குடன் களமிறங்கிய நியூசிலாந்து அணிக்கு சீரான இடைவெளியில் விக்கெட்டுகளை இழந்து தடுமாறியது. அந்த அணி 18 ஓவர்களில் 171 ரன்கள் எடுத்து ‘ஆல்-அவுட்’ ஆனது. இதன்மூலம் இங்கிலாந்து அணி 65 ரன்கள் வித்தியாசத்தில் அபார வெற்றி பெற்றது.

நியூசிலாந்து தரப்பில் அதிகபட்சமாக டிம் செபெர்ட் 39 ரன்னும், கேப்டன் சான்ட்னெர் 36 ரன்னும் எடுத்தனர். இங்கிலாந்து தரப்பில் அடில் ரஷித் 4 விக்கெட்டுகளும், லுக் வுட், பைடன் கார்ஸ், லியாம் டாவ்சன் ஆகியோர் தலா 2 விக்கெட்டுகளும் வீழ்த்தினர்.

இதன்மூலம் 3 போட்டிகள் கொண்ட தொடரில் இங்கிலாந்து அணி 1-0 என்ற கணக்கில் முன்னணியில் உள்ளது. இவ்விரு அணிகளுக்கும் இடையிலான 3-வது மற்றும் கடைசி டி20 போட்டி 23-ம் தேதி (வியாழக்கிழமை) ஆக்லாந்தில் நடக்க உள்ளது.