திருவனந்தபுரம்,

கேரளா கிரிக்கெட் லீக் 2025 டி20 தொடர் அம்மாநிலத்தில் விறுவிறுப்பாக நடைபெற்று வருகிறது. இதில் நேற்று நடைபெற்ற 19-வது லீக் ஆட்டத்தில் அதானி திருவனந்தபுரம் ராயல்ஸ் - காலிகட் குளோப்ஸ்டார்ஸ் அணிகள் மோதின. இதில் டாஸ் வென்ற திருவனந்தபுரம் முதலில் பந்துவீச்சை தேர்வு செய்தது.

அதன்படி முதலில் பேட்டிங் செய்த காலிகட் குளோப்ஸ்டார்ஸ் அணி 20 ஓவர்களில் 6 விக்கெட்டுகளை இழந்து 186 ரன்கள் குவித்தது. அதிகபட்சமாக சல்மான் நிசார் 86 ரன்கள் அடித்தார்.

அந்த அணி 18 ஓவர்கள் வரை 6 விக்கெட்டுகளை இழந்து வெறும் 115 ரன்கள் மட்டுமே அடித்திருந்தது. சல்மான் நிசார் 13 பந்துகளை சந்தித்து 17 ரன்கள் மட்டுமே அடித்திருந்தார். ஆனால் கடைசி 2 ஓவர்களில் அவர் ஆட்டத்தின் போக்கை அப்படியே மாற்றிவிட்டார்.

பாசில் தம்பி வீசிய 19-வது ஓவரை எதிர்கொண்ட சல்மான் நிசார் முதல் 5 பந்துகளையும் தொடர்ச்சியாக சிக்சருக்கு பறக்க விட்டார். கடைசி பந்தில் சிங்கிள் எடுத்த அவர், இறுதி ஓவருக்கான ஸ்ட்ரைக்கை தன்வசம் வைத்து கொண்டார். 20-வது ஓவரை அப்ஜித் பிரவின் வீசினார்.

அந்த ஓவரின் முதல் பந்தை சல்மான் சிக்சருக்கு பறக்கவிட்டார். அடுத்த பந்தை பிரவின் வைடாக வீசினார். அதற்காக வீசிய மறு பந்தில் நோபால் போட்டார். அதில் 2 ரன் எடுத்த சல்மான் நிசர் அதற்கடுத்த பந்தில் சிக்சர் பறக்க விட்டார். இதனால் முதல் 2 பந்துகளிலேயே 2 சிக்சர் உட்பட 16 ரன்கள் காலிகட் குளோப்ஸ்டார்ஸ் அணிக்கு கிடைத்துவிட்டது. அதற்கு அடுத்து வீசப்பட்ட 4 பந்துகளையும் எதிர்கொண்ட சல்மான் நிசார் தொடர்ச்சியாக சிக்சருக்கு பறக்க விட்டார். இதனையும் சேர்த்து கடைசி ஓவரில் மட்டும் காலிகட் குளோப்ஸ்டார்ஸ் அணிக்கு 40 ரன்கள் கிடைத்தது.

கடைசி ஓவரில் எடுக்கப்பட்ட ரன்கள் விவரம்:

6 சிக்சர்கள் - 36 ரன்கள்

ஒரு வைடு - ஒரு ரன்

ஒரு நோபால் - ஒரு ரன் + நோபாலில் ஒடி எடுக்கப்பட்ட 2 ரன்கள்

மொத்தம் 26 பந்துகளை எதிர்கொண்ட சல்மான் நிசார் 86 ரன்கள் விளாசி அபார பினிஷிங் கொடுத்தார். குறிப்பாக கடைசி 12 பந்துகளில் 11 சிக்சர்களை அடித்து அதிரடியில் மிரள வைத்தார்.

அடுத்து விளையாடிய அதானி திருவனந்தபுரம் ராயல்சை 19.3 ஓவரில் 173 ரன்களுக்கு சுருட்டிய காலிகட் குளோப்ஸ்டார்ஸ் அணி 13 ரன்கள் வித்தியாசத்தில் வென்றது.