சாதிக்க எதுவும் தடையில்லை - சங்கீதா

நான் திருச்சி மாவட்டத்தில் உள்ள மீனாட்சிபுரம் என்ற கிராமத்தில் வசிக்கிறேன். எனக்கு 40 வயது ஆகிறது. எனது கணவர் ஐயப்பன் தற்காப்பு கலை பயிற்சியாளர். கராத்தே பயிற்சி பள்ளிகளை நடத்தி வருகிறார். எங்களுக்கு இரண்டு பெண் குழந்தைகள் உள்ளனர்.

திருமணத்திற்கு முன்பு எனக்கு கராத்தே பற்றி எதுவும் தெரியாது. கிராமத்திலேயே வளர்ந்ததால், சென்னைக்கு வந்தபோது எல்லாமே புதிதாக இருந்தது. கணவரின் தூண்டுதல் காரணமாக  2013-ம் ஆண்டு கராத்தே கற்றுக்கொள்ள ஆரம்பித்தேன். ஆர்வத்தோடும், முயற்சியோடும் கற்றுக் கொண்டதால் 2016-ல் பிளாக் பெல்ட் வாங்கினேன். தற்போது கணவருடன் சேர்ந்து கராத்தே பயிற்சிப் பள்ளியை நிர்வகித்து வருகிறேன். ‘உங்களை நீங்கள் முதலில் வெல்ல வேண்டும்’ என்ற பொன்மொழியை மந்திரமாக எடுத்துக்கொண்டு செயல்பட்டு வருகிறேன்.

ஈகோ, பயம், சோம்பல் போன்ற எதிர்மறை குணங்களில் இருந்து வெளிவர, நம்மை நாமே தயார் செய்துகொள்வதற்கு கராத்தே உதவும். சிறு குழந்தைகள் முதல் பெரியவர்கள் வரை சமூகத்தில் நிறைய பிரச்சினைகளை சந்தித்து வருகின்றனர். பெண்கள் மனதாலும், உடலாலும் பலமானவர்கள். அவர்களின் வலிமையை தற்காப்புக் கலைகள் மெருகூட்டும். பெண்கள் ஏதேனும் ஒரு தற்காப்புக் கலையை கற்றுக்கொள்வது நல்லது. அது அவர்களுக்கு பாதுகாப்பு வளையமாக இருக்கும். தன்னம்பிக்கை கொடுக்கும். வாழ்க்கையில் எந்த முயற்சியிலும் துவண்டுபோகாமல், முன்னேறி செல்லும் மனநிலையைத் தரும்.

2019-ம் ஆண்டு 24 மணி நேரம் தொடர்ந்து கராத்தே டெமாண்ட்ஸ்டிரேஷன் செய்து உலக சாதனை செய்திருக்கிறேன். 2022-ம் ஆண்டு மார்ச் மாதம், 11 கற்களை (ஒவ்வொரு கல்லும் 100 கிலோ எடை) என் மேல் வைத்து சுத்தியால் உடைத்தனர். இந்த உலக சாதனைகள் அனைத்தும் ‘சோழன் புக் ஆப் வேர்ல்டு ரெக்கார்’டில் இடம் பெற்றது. உலக அளவில் இதுவரை யாரும் செய்யாத ஒரு சாதனையை செய்ய வேண்டும் என்பது எனது நெடுநாள் கனவு. இந்த சாதனையின் மூலம் என் கனவு நிறைவேறியுள்ளது. இதுவரை இம்மாதிரியான சாதனைகளை ஆண்கள் மட்டும் செய்ய முடியும் என்று கூறிவந்தார்கள். அந்தக் கூற்றை முறியடிக்கும் வகையில் என் சாதனை அமைந்தது. எனது இரண்டு குழந்தைகளும் அறுவை சிகிச்சை மூலம் பிறந்தவர்கள். அத்தகைய உடல்நிலையைக் கொண்டிருந்தாலும், மன தைரியத்தோடு இந்தச் சாதனையை நிகழ்த்தினேன். இந்த உலக சாதனையை படைத்த முதல் பெண் நான்தான்.

இந்த சாதனை படைக்க நீங்கள் மேற்கொண்ட முன்னேற்பாடுகள் குறித்து..

இந்த சாதனையை 2020-ம் வருடத்திலேயே செய்ய வேண்டும் என்று நினைத்தேன். கொரோனா ஊரடங்கு காரணமாக செய்ய முடியாமல் போனது. அப்போது 500 கிலோ கல் உடைக்கும் சாதனையை செய்ய வேண்டும் என்றுதான் முடிவு செய்திருந்தோம். ஆனால், ஊரடங்கு காரணமாக சில மாதங்கள் பயிற்சியை நீட்டிக்க கால அவகாசம் கிடைத்தது. அந்தக் காலத்தில் மூச்சுப் பயிற்சி, யோகா போன்றவற்றை செய்தேன். இதன் மூலம் மனதையும், உடலையும் ஒருநிலைப்படுத்தும் பயிற்சி எடுத்தேன். சாதனைக்கு முன்னர் டிரையல் செய்தேன், அதில் நல்ல பலன் கிடைத்தது. நான் சைவ உணவை மட்டுமே சாப்பிடுபவள். காய்கறி, பழங்களை மட்டும் சாப்பிட்டு இந்த சாதனையைப் படைத்திருக்கிறேன்.