சுலபமான கிறிஸ்துமஸ் கேக்

கிறிஸ்துமஸ் என்றதுமே நம் நினைவில் முதலில் வருவது, கேக் தான். சிறியவர் முதல் பெரியவர் வரை விரும்பி சுவைக்கும் வகையில், மிருதுவான கேக்கை சுலபமான முறையில் மைக்ரோ ஓவன் பயன்படுத்தாமல் செய்வது எப்படி? என்பது பற்றி இங்கு காண்போம்.

மைதா மாவு - 250 கிராம்

சர்க்கரை - 5 தேக்கரண்டி

கோகோ பவுடர் - 2 தேக்கரண்டி

எண்ணெய் - 50 மில்லி

பேக்கிங் பவுடர் - 1 தேக்கரண்டி

பேக்கிங் சோடா - ½ தேக்கரண்டி

பழுத்த வாழைப்பழம் - 2

காய்ச்சிய பால் - 4 தேக்கரண்டி

சாக்லேட் துண்டுகள் - தேவைக்கேற்ப

வினிகர் - 1 தேக்கரண்டி

வாழைப்பழத் துண்டுகள், சர்க்கரை மற்றும் எண்ணெய் ஆகியவற்றை மிக்சியில் போட்டு நன்றாக அரைக்கவும்.  மைதா, கோகோ பவுடர், பேக்கிங் சோடா, பேக்கிங் பவுடர் இவை நான்கையும் ஒன்றாகக் கலந்து சலித்து எடுக்கவும். அதை வாழைப்பழ கலவையில் கொட்டிக் கிளறவும். அதில் சிறிது சிறிதாக பால் ஊற்றி பசை போல, சிறிது தளர்வாக பிசைந்து கொள்ளவும். 

பின்னர் அதனுடன் வினிகர் மற்றும் சாக்லேட் துண்டுகளைச் சேர்த்து கலக்கவும். ஒரு பாத்திரத்தின் உட்பகுதி முழுவதும் எண்ணெய் தடவி இந்தக் கலவையை அதில் ஊற்றவும்.

அடுப்பில் அடி கனமான பாத்திரத்தை வைத்து, அதில் சிறிது தண்ணீரை ஊற்றி குக்கிங் ஸ்டாண்டு பொருத்தவும். கேக் கலவை இருக்கும்  பாத்திரத்தை அதன் மேல் வைத்து, காற்று புகாதவாறு மூடி, 

மிதமான தீயில் 30 நிமிடங்கள் வரை வேக வைத்து பின்பு ஆற வைக்கவும். இப்பொழுது சுவையான சாக்லேட் பனானா கேக் தயார்!

பால் - 80 மி.லி

பொடித்த சர்க்கரை - 1 கப்

மைதா மாவு - 1 கப்

பேக்கிங் சோடா - ½ டீஸ்பூன்

பேக்கிங் பவுடர் - 1 டீஸ்பூன்

உப்பு - ¼ டீஸ்பூன்

எண்ணெய் - ½ கப்

வெனிலா எசன்ஸ் - ½ டீஸ்பூன்

நெய் - தேவையான அளவு

லைன் பேப்பர் - 1

மணல் - 1 ½ கப்

ஒரு பாத்திரத்தில் சலித்த சர்க்கரைப் பொடி மற்றும் ¼ கப் எண்ணெய் சேர்த்து பசை போல நன்றாகக் கலக்க வேண்டும். அதில் மைதா மாவு, பேக்கிங் சோடா, பேக்கிங் பவுடர், உப்பு மற்றும் ¼ கப் எண்ணெய் சேர்த்துக் கிளற வேண்டும். இந்தக் கலவையில் பாலை ஊற்றி, கட்டிகள் இல்லாதவாறு நன்றாகக் கலக்க வேண்டும். இறுதியாக அதில் வெனிலா எசன்ஸ் ஊற்றி மீண்டும் ஒரு முறை நன்றாகக் கலக்கவும்.

இப்போது கேக் தயார் செய்யும் பாத்திரத்தின் உட்பகுதி முழுவதும் நெய்யைத் தடவவும். அதற்குள் லைன் பேப்பரை வைத்து, அதன் மேல் கேக் கலவையைப் போட்டு காற்று குமிழ்கள் இல்லாத வகையில் சமன் செய்யவும்.

பிரஷர் குக்கரில் மணலைக்கொட்டி, அதிக தீயில் ஐந்து நிமிடங்கள் வரை வைக்கவும். பின்பு, சிறிய பாத்திர ஸ்டாண்டை மணலில் வைத்து, அதன் மேல் கேக் பாத்திரத்தை வைத்து குக்கரை மூடவும். கேக் கலவையை குறைந்த தீயில் 45 நிமிடங்கள் வரை வேக வைத்து எடுக்கவும். பிறகு கவனமாக கேக்கை வெளியே எடுத்து, உங்கள் விருப்பப்படி அலங்கரித்து பரிமாறலாம்.