சுயதொழில் மூலம் சுற்றுச்சூழல் காக்கும் திவ்யா

கர்நாடக மாநிலத்தில் பிறந்த நான், பள்ளி மற்றும் கல்லூரிப் படிப்பை அங்கேயே முடித்தேன். தனியார் நிறுவனத்தில் பணியாற்றி வந்தேன். திருமணத்துக்கு பின்பு கணவருடன் கோவையில் வசித்து வருகிறேன்.

தற்போது உலகம் முழுவதும் பெரிய பிரச்சினையாக இருப்பது பிளாஸ்டிக் பொருட்களின் பயன்பாடு. அன்றாடம் உபயோகிக்கும் பல பொருட்கள் பிளாஸ்டிக் கலந்தே வருகின்றன. இவற்றை கட்டுப்படுத்துவதற்கு பிளாஸ்டிக் பொருட்களுக்கு மாற்றாக, இயற்கைக்கு தீங்கு ஏற்படுத்தாத பைகள் மற்றும் பொருட்களைத் தயாரிக்கலாம் என்று தோன்றியது. அதைத் தொடர்ந்து பல்வேறு ஆய்வுகளுக்குப் பின்பு புதிய நுட்பங்களைப் பயன்படுத்தி மக்கும் வடிவிலான பிளாஸ்டிக் பைகளையும், பொருட்களையும் தயாரித்தேன். இவற்றை முழுவதுமாக பல முறை பயன்படுத்திய பின்பு தூக்கி எறியாமல் மண்ணில் புதைத்து வைக்கும்போது, அந்தப் பொருட்களில் கலக்கப்பட்ட தாவர விதைகள் செடிகளாகவும், மரங்களாகவும் வளர்ந்து சுற்றுச்சூழலுக்கு பசுமை சேர்க்கும்.

மல்டி லேயர் பிளாஸ்டிக் பயன்படுத்தி  ஆடைகள், தண்ணீர் பாட்டில், பேனா, பென்சில், ரப்பர், புத்தகங்கள், டைரி, பரிசுப் பொருட்கள் என 50-க்கும் மேற்பட்ட பொருட்கள் தயாரிக்கிறோம்.

விவசாயிகள் உற்பத்தி செய்யும் பொருட்களை நேரடியாக வாங்கி, விற்பனை செய்து வருகிறேன். எங்கள் நிறுவனத்திற்கு தேவையான விதைகளையும் அவர்களிடம் இருந்து நேரடியாக பெற்றுக்கொள்கிறேன்.