முன்னேறுவதற்கு படிப்பு தடை இல்லை- தீபா

தனது உழைப்பின் பலனாக, தொடர்ந்து மழலையர் விளையாட்டுப் பள்ளியையும், பெண்கள் தங்கும் விடுதியையும் தொடங்கி நடத்துகிறார். தன்னால் இயன்ற வகையில் பெண்களின் நலனுக்காக உதவி வருகிறார்.

நான் பிறந்து வளர்ந்தது சென்னையில். என் கணவர் தனியார் நிறுவனத்தில் பணியாற்றுகிறார். எனது இரண்டு குழந்தைகளும் பள்ளியில் படித்து வருகிறார்கள். நான் 10-ம் வகுப்பு வரை மட்டுமே படித்திருக்கிறேன். என்னுடைய குடும்ப சூழ்நிலை காரணமாக படிப்பைத் தொடர முடியவில்லை. ஆனால், இன்று சொந்தமாக குழந்தைகள் விளையாட்டு பள்ளி மற்றும் பெண்கள் தங்கும் விடுதி நடத்தி வருகிறேன்.

2012-ம் ஆண்டு குழந்தைகள் விளையாட்டு பள்ளியை ஆரம்பித்தேன். அது வெற்றிகரமாக இயங்கத் தொடங்கியதும், மேலும் இரண்டு பள்ளிகளைத் தொடங்கி நடத்தி வருகிறேன். அனைத்து பள்ளிகளும் பல வளர்ச்சிகளை அடைந்து இயங்கி வருகின்றன.

அதன் பிறகு உழைக்கும் மகளிருக்கான தங்கும் விடுதியை 2017-ம் ஆண்டு ஆரம்பித்தேன். அது படிப்படியாக விரிவடைந்து இன்று மூன்று இடங்களில் நடத்தி வருகிறேன்.