தி.மு.க.- காங்கிரஸ் கூட்டணியில் விரிசல் வராது - திருமாவளவன் பேட்டி

மதுரை,

மதுரை விமான நிலையத்தில் விடுதலை சிறுத்தைகள் கட்சி தலைவர் தொல்.திருமாவளவன் நிருபர்களிடம் கூறியதாவது:–

நடிகர் கமல்ஹாசன் தி.மு.க., காங்கிரஸ் கூட்டணியில் விரிசல் ஏற்படும் என எதன் அடிப்படையில் கூறுகிறார் என்று தெரியவில்லை. விடுதலை சிறுத்தைகள் கட்சி அந்த கூட்டணியில் உள்ளதால், கூட்டணியில் விரிசல் இல்லை என திட்டவட்டமாக கூறுகிறேன். தி.மு.க., காங்கிரஸ் கூட்டணியில் கமல்ஹாசன் தமது இயக்கத்தை இணைத்து கொண்டால் வரவேற்கிறேன்.

நெடுஞ்சாலை துறை டெண்டரில் ஊழல் நடைபெற்றுள்ளது என்ற வழக்கில் முகாந்திரம் இருப்பதால் தான் நீதிமன்றம் சி.பி.ஐ. விசாரணைக்கு உத்தரவிட்டுள்ளது. முதல்–அமைச்சர் மீதான குற்றச்சாட்டில் முகாந்திரம் இருந்தால் விசாரணை செய்யலாம் என நீதிமன்றம் கூறி உள்ளதால் அவர் பதவி விலகுவது தான் சரியாக இருக்கும்.

நிர்மலாதேவி விவகாரத்தில் கவர்னர் மாளிகை தொடர்ந்து விளக்கங்களை அளித்து வருவது கவர்னர் மாளிகையில் உள்ளவர்கள் வேலையில்லாமல் இருக்கிறார்கள் என்பதை தான் காட்டுகிறது. அந்த விவகாரம் சிறியது தான் என்றால் அவர்கள் ஏன் அதை பெரிதுபடுத்த பார்க்கிறார்கள் என தெரியவில்லை. இவ்வாறு அவர் கூறினார்.